Трамп ўзининг Украина ва Россия бўйича махсус вакилини танлади

АҚШнинг сайланган президенти Дональд Трамп Украинадаги урушни тинч йўл билан ҳал қилиш бўйича ўзининг махсус вакили лавозимига номзодни маълум қилди. Бу истеъфодаги генерал-лейтенант Кит Келлог. Бу ҳақда кеча, 27 ноябрь куни Трампнинг Truth Social ижтимоий тармоғида маълум қилинди.

“Мен Кит Келлогни Президент ёрдамчиси ҳамда Украина ва Россия бўйича махсус вакил этиб тайинлаганимдан жуда мамнунман. Кейт таниқли ҳарбий ва бизнес мартабасига эга эди, жумладан, менинг биринчи маъмуриятимда миллий хавфсизлик соҳасида жуда нозик лавозимларда хизмат қилган. У бошиданоқ мен билан эди!” деб ёзган Дональд Трамп.

80 ёшли Келлог номзоди ҳали ҳам АҚШ Сенати томонидан тасдиқланиши керак, бироқ республикачилар Конгресснинг юқори палатасида кўпчилик ўринни қўлга киритганини ҳисобга олсак, Трампнинг йўлида ҳеч қандай тўсиқ бўлмаслиги керак.

Илгари АҚШ президентининг Украинадаги урушни тинч йўл билан ҳал қилиш бўйича махсус вакили лавозимига даъвогарлар орасида – ҳозирча мавжуд бўлмаган лавозим – Миллий разведканинг собиқ раҳбари, Германиядаги собиқ элчи Ричард Гренелл, шунингдек,  АҚШнинг Эрон бўйича собиқ махсус вакили Брайан Ҳук ва Трампнинг Россияда туғилган ва у ерда 11 йил яшаган адвокати Борис Эпштейн ҳам бор эди. 

Кит Келлог Трампнинг президентликка биринчи сайланганидан кейин ҳам АҚШнинг ўтиш даври маъмуриятида эди. Ўшанда у мудофаа сиёсати масалалари билан шуғулланган, кейинроқ, 2017 йилнинг январидан 2018 йилнинг апрелигача АҚШ Миллий хавфсизлик кенгашининг ижрочи котиби, кейин эса вице-президент Майк Пенснинг миллий хавфсизлик бўйича маслаҳатчиси бўлган.

Маълумотларга кўра, Келлог аввалроқ Россиянинг Украинага қарши урушини тезда тугатиш бўйича Трамп таклиф қилган режа ҳаммуаллифларидан биридир. Ташаббус Вашингтон Москва билан тинчлик музокараларини бошламаса, Киевга ҳарбий ёрдам беришдан бош тортиши билан таҳдид қилади, деб тахмин қилинади.

Эслатиб ўтамиз, олдинроқ Америка Қўшма Штатлари Президенти Жо Байден маъмурияти Украина учун 725 миллион долларлик янги ҳарбий ёрдам пакетини тайёрлаётгани хабар қилинганди.