Трамп Уммонни бомбардимон қилиш билан қўрқитди

АҚШ Президенти Дональд Трамп Эрон билан музокаралар кутилганидек кечмаётганини айтиб, Ҳормуз бўғозидаги кемалар қатновини тиклаш бўйича Теҳрон билан музокара олиб бораётган Уммонга қарши ҳарбий куч ишлатиш билан таҳдид қилди. Бу ҳақда “Reuters“ хабар берди.

Трампнинг айтишича, Эрон АҚШ керак деб ҳисоблаётган келишувга рози бўлмаяпти. У Теҳронни таслим бўлишга чақириб, Вашингтоннинг Эронга қарши урушдаги асосий мақсади мамлакатнинг ядровий қуролга эга бўлишига йўл қўймаслик эканини таъкидлаган.

“Улар мен зарур деб ҳисоблаётган келишувга рози бўлмайди. Биз у ерда ягона сабаб билан турибмиз: Эрон ядровий қуролга эга бўла олмайди”, деган Трамп Оқ уйда журналистларга.

АҚШ Президенти, шунингдек, Эрон билан жорий йилнинг июнь ойида тузилган вақтинчалик келишувни узайтириш режалаштирилмаганини билдирган. Мазкур келишув ҳарбий амалиётларни тўхтатиш ва 60 кун ичида якуний битим бўйича музокаралар олиб боришни назарда тутган эди.

Трамп бундан аввал “Fox News” телеканалига берган интервьюсида Эрон “оқ байроқ кўтариб, таслим бўлиши керак”лигини айтган.

Айни пайтда Уммон ва Эрон Ҳормуз бўғозида тижорий кемалар қатновини тиклаш бўйича музокаралар олиб бормоқда. Трамп Уммон музокараларга халақит берса, мамлакатга зарба беришини айтган.

“Агар Уммон халақит берса, биз уни қаттиқ бомбардимон қиламиз”, деган Трамп “Fox News” телеканалига.

Кейинчалик Оқ уйда журналистлар ундан Уммонга нисбатан сабри тугаган-тугамаганини сўраган. Трамп Уммон “ўзини яхши тутмаган”ини айтган, бироқ мамлакат билан бошқа масалаларда бўлгани каби “жуда осон шуғулланишларини” билдирган.

Эслатиб ўтамиз, кеча, 17 август куни АҚШ ва Эрон ўт очишни тўхтатиш режимини яна 60 кунга узайтиришга келишиб олганди.