Трамп улкан сувости кемасини йўқ қилди

АҚШ Президенти Дональд Трамп Лотин Америкасидан Қўшма Штатлар томон ҳаракатланган, ичида гиёҳванд моддалар бор деб тахмин қилинган “улкан сувости кемаси” йўқ қилинганини эълон қилди. Бу ҳақда Оқ уй раҳбари ўзининг Truth Social тармоғида ёзиб қолдирди. 

“Менга АҚШга йўналган, гиёҳванд моддалар билан тўла бўлган улкан сув ости кемасини йўқ қилиш шарафи насиб этди”, дея мақтанган Трамп ўз тармоғида. 

Унинг сўзларига кўра, АҚШ разведкаси кемада фентанил ва бошқа наркотик моддалар бўлганини тасдиқлаган. Трампнинг таъкидлашича, агар бу юк мамлакат ҳудудига етиб келганида, камида 25 минг америкалик ҳалок бўлган бўларди.

АҚШ ҳарбийлари операция давомида талофат кўрмагани қайд этилган. 

Шу билан бирга, АҚШ томони кемада ҳақиқатдан ҳам наркотик моддалар ортилгани ҳақидаги бирор бир аниқ далил тақдим этмаган. 

Кариб денгизидаги ҳужумлар

17 октябрь куни АҚШ ҳарбийлари Кариб денгизида сув остида ҳаракатланаётган, эҳтимол, ярим сувга ботувчи кемага зарба берган. Қутқарув операцияси давомида икки киши АҚШ ҳарбий-денгиз кучлари кемасига олиб чиқилган, яна икки нафар экипаж аъзоси ҳалок бўлган.

АҚШ Давлат котиби Марко Рубио омон қолганлар ҳақида саволга “Бу террорчилар”, дея жавоб берган.
АҚШ ҳужумидан омон қолган икки киши, яъни Эквадор ва Колумбия фуқароларини ватанига қайтариш режалаштирилган. Уларга нисбатан ҳибсга олиш ва суд жараёни қўлланади.

Венесуэлага қарши жанглар 

Трамп, аввалроқ, Венесуэла Президенти Николас Мадуро “жиноятчи гуруҳ”ни бошқараётгани, улар АҚШ ва бошқа Ғарб давлатларида оммавий қотилликлар, наркотрафик, жинсий савдо ва террор ҳаракатлари билан шуғулланаётганини айтган эди. Унга кўра, Пентагон бу ҳудудда наркокартелларга қарши ҳарбий операциялар бошлашга тайёр.

Сентябрь ойидан буён АҚШ армияси наркотрафикка алоқадор деб ҳисобланган камида олти кемага зарба берган. CNBC маълумотларига кўра, бу операциялар оқибатида камида 29 киши ҳалок бўлган.
Ҳозирда Венесуэла қирғоқлари яқинида АҚШ ҳарбий-денгиз кучларига тегишли бир нечта кемалар, 10 та F-35 жанговар самолёти, 2200 аскардан иборат денгиз пиёдалари экспедицион бўлинмаси ва сувости кемаси жойлаштирилган.

Венесуэланинг БМТдаги элчиси Самуэль Монкада АҚШ ҳужумларини ноқонуний, суверенитетга тажовуз сифатида баҳолаб, БМТ Хавфсизлик Кенгашидан бу масалага муносабат билдиришни сўраган. 

Эслатиб ўтамиз, аввалроқ ҳам Трамп Венесуэладан АҚШ томонга ҳаракатланаётган “наркотеррористлар” қайиғига қарши зарба берилганини маълум қилганди. Унга кўра, АҚШ ҳарбийлари халқаро сув ҳудудида гиёҳванд моддалар олиб кетаётган кемани нишонга олган. Трампнинг қўшимча қилишича, кема Қўшма Штатлар томон йўл олган бўлиб, ҳужум оқибатида уч нафар “наркотеррорист” ҳалок бўлган, америкалик ҳарбийларларга эса ҳеч қандай зиён етмаган.