Трамп Украина музокаралари туфайли таътилни бекор қилди – Оқ уй

АҚШ Президенти Дональд Трамп Украина ва Россия ўртасидаги урушни тўхтатиш бўйича музокараларда ишлаш учун жорий йилнинг август ойидаги таътилини бекор қилган. Бу ҳақда Оқ уй матбуот котиби Кэролайн Ливиттга таяниб, “The Hill” хабар берди.

Ливиттнинг сўзларига кўра, Трамп Нью-Жерсидаги гольф-курортида ҳам тинчлик музокараларини давом эттириш имкониятини кўриб чиққан, бироқ бунинг ўрнига Оқ уйдан чиқмасликка қарор қилган.

“Одатда, АҚШ Президентлари айнан шу пайтда таътилга чиқади, аммо бу Президент эмас. Унинг Бедминстерда (Нью-Жерсидаги гольф-клуб) бир-икки ҳафта ишлаши ҳақида гап бўлди, лекин у бу ғоядан воз кечди. У мақсадга эга инсон. У ҳаракат қилишни хоҳлайди. Ҳаммасини тез қилишни истайди”, дейди Оқ уй вакили.

Нашрнинг ёзишича, АҚШда президентлар, одатда, август ойида, Конгресс таътилга чиққан вақтда таътил олади.

Эслатиб ўтамиз, охирги кунлар давомида Трамп Аляскада Россия Президенти Владимир Путин билан учрашди, Оқ уйда Зеленскийни қабул қилди ва ундан сўнг украиналик ҳамда европалик етакчилар билан учрашув ўтказди. Учрашув якунида Трамп Путин ва Зеленский учрашувига тайёргарликни бошлаганини маълум қилди.