Трамп тошкентлик маслаҳатчисини Ҳиндистонга элчи қилмоқчи

north_east

Трампнинг бош маслаҳатчиси Ўзбекистонда туғилгани маълум бўлди

Америка Қўшма Штатлари Президенти Дональд Трамп АҚШнинг Ҳиндистондаги элчиси лавозимига Сержио Гор номзодини кўрсатгани ҳамда уни Жанубий ва Марказий Осиё бўйича махсус вакил этиб тайинлашга қарор қилганини маълум қилди. Бу ҳақда у кеча, 23 август куни ўзининг Truth Social ижтимоий тармоғида ёзди.

“Мен қувонч билан эълон қиламанки, Сержио Горни АҚШнинг Ҳиндистон Республикасидаги янги элчиси ҳамда Жанубий ва Марказий Осиё бўйича махсус вакил сифатида номзод қилиб кўрсатаяпман”, деб ёзди Америка раҳбари.

Ҳозирда Сержио Гор Оқ уйнинг кадрлар бошқармасини бошқариб келмоқда. Трампнинг таъкидлашича, Гор Сенат томонидан янги лавозимга тасдиқлангунга қадар ушбу вазифада ишлаб туради.

“Дунёнинг энг кўп аҳолига эга минтақаси учун менинг кун тартибимни амалга ошира оладиган ва бизга “Американи яна буюк қилиш”да ёрдам берадиган, тўлиқ ишонадиган инсоннинг бўлиши муҳим”, деб ёзди Президент.

Трампнинг таъкидлашича, Гор ва унинг жамоаси маъмурият таркибида деярли 4000 нафар “Америка Биринчи ватанпарварлари”ни ишга қабул қилган.

“Сержионинг президент кадрлар директори сифатидаги роли бизга америкаликлардан олинган мислсиз мандатни бажаришда муҳим бўлди”, дея қўшимча қилди Трамп.

Шундай қилиб, Сержио Гор Демократлар томонидан тайинланган, Байден президентлиги тугагач Калифорнияга қайтган собиқ элчи Эрик Гарсеттининг ўрнини эгаллашди. 

Маълумот учун, Гор 1986 йилда Тошкентда туғилган ва туғилганда унга Сергей Гороховский исми берилган. Унинг оиласи 1999 йилда, у тахминан 12 ёш бўлганида, АҚШга кўчиб ўтган. Отаси Юрий Гороховский совет самолётларини, жумладан Ҳиндистон ҳаво кучлари ишлатадиган Ил-76 самолётини яратишда иштирок этган авиаконструктор бўлган. Онаси эса асли исроиллик экани айтилади.

Гор Лос-Анжелесда вояга етган, кейинчалик Оқ уй яқинидаги Жорж Вашингтон университетида ўқиш учун Вашингтонга кўчган. 

Ёш консерватив доираларда фаол бўлиб, у республикачи қонун чиқарувчилардан — ўта ўнгчи қарашлари билан танилган Стив Кинг ва Мишель Бахманнинг матбуот котиби бўлиб ишлаган. Кейинчалик сенатор Рэнд Полнинг муовин аппарати раҳбарига айланган.

Гор Трамп атрофида 2020 йилги сайловлар пайтида пайдо бўлди, MAGA ҳаракатида тез кўтарилди ва 2024 йилда Трамп ғалабасидан сўнг президент кадрлар директори лавозимига тайинланди. Трамп уни ҳукумат тизимида қарийб 4000 нафар содиқ одамларни жойлаштириш билан шарафлайди.

Гор Трампга садоқати билан танилган, аммо бошқалар томонидан қарорларида ностабил ва олдиндан айтиб бўлмайдиган шахс сифатида танқид қилинган. У Трампнинг миллиардер маслаҳатчиси Илон Маск билан ҳам тортишган. Шунингдек, Гор Жаред Айзекманнинг NASA раҳбари этиб тайинланишига қарши чиқиб, унинг ўтмишда демократларга қилган хайриялари ҳақида маълумот бериши орқали номзодини йўққа чиқишида роль ўйнаган.