Трамп Россия ва Украина ўртасида 3 кунлик сулҳ эълон қилди

АҚШ Президенти Дональд Трамп Россия ва Украина ўртасида 9–11 май кунлари уч кунлик ўт очишни тўхтатиш режими жорий этилишини маълум қилди. Бу ҳақда у ўзининг Truth Social тармоғида ёзиб қолдирди.

“Мен мамнуният билан маълум қиламанки, Россия ва Украина ўртасидаги урушда уч кунлик ўт очишни тўхтатиш режими эълон қилинади – 9, 10 ва 11 май кунлари. Россияда Ғалаба куни нишонланади, аммо Украинада ҳам, чунки у ҳам Иккинчи жаҳон урушида муҳим рол ўйнаган”, дея ёзган Трамп.

Унинг айтишича, келишув барча жанговар ҳаракатларни тўхтатишни, шунингдек, ҳар икки томондан 1000 нафардан ҳарбий асир алмашинувини ҳам ўз ичига олади.

“Бу илтимосни шахсан ўзим билдирдим ва Президент Путин ҳамда Президент Зеленскийнинг розилигини юқори баҳолайман”, дея қўшимча қилган Оқ уй раҳбари.

Трамп ушбу вақтинчалик сулҳ “можаронинг якунига олиб борувчи бошланиш” бўлишига умид билдирган.

“Умид қиламанки, бу жуда узоқ, қонли ва оғир урушнинг тугашига олиб келадиган жараённинг бошланиши бўлади. Иккинчи жаҳон урушидан бери энг йирик можарони якунлаш бўйича музокаралар давом этмоқда ва ҳар куни мақсадга янада яқинлашяпмиз”, дея таъкидлаган Трамп.

Эслатиб ўтамиз, Россия Мудофаа вазирлиги Украина томонини 8 май куни эълон қилинган ўт очишни тўхтатиш режимини бузишда айблаганди ва шу сабабдан жавоб зарбаси бўлишини маълум қилганди.

Украина Президенти Владимир Зеленский ҳам Россияга яқин давлатларга мурожаат қилиб, 9 май куни Москвага бормасликни тавсия берганди.