Трамп Путиннинг таклифини қўллаб-қувватлади

АҚШ Президенти Дональд Трамп Россия билан нодир ер металларига кириш бўйича шартнома тузиш ғоясини қўллаб-қувватлашини айтди. Бу ҳақда “Reuters” хабар берди.

“Мен Россиянинг ноёб ерларига кириш ҳуқуқини олиш бўйича шартнома тузмоқчиман”, дея унинг сўзларини келтиради агентлик.

Оқ уй раҳбарининг сўзларига кўра, Қўшма Штатлар Россиядан фойдали қазилмаларни сотиб олмоқчи.

Трамп бир кун аввал АҚШнинг Россиянинг ноёб тупроқ металларига қизиқишини эълон қилган эди. У расмий Вашингтон Россиянинг ноёб ер металларининг “катта захиралари” ва мамлакатда мавжуд бўлган бошқа “жуда қимматли ресурслар”дан манфаатдорлигини айтганди.

24 февраль куни Россия Президенти Владимир Путин ВГТРК мухбири Павел Зарубинга берган интервьюсида Москва Қўшма Штатларга нодир металларни қазиб олиш ва алюминий ишлаб чиқариш соҳасида ҳамкорлик қилишни таклиф қилишга тайёрлигини айтган эди. 

Путин ўз таклифини қўшни давлатга қарши уруш пайтида Россия томонидан босиб олинган Украина ҳудудларига ҳам йўллади.

“Биз чет эллик ҳамкорларни янги деб аталган ҳудудларга жалб қилишга тайёрмиз. У ерда ҳам маълум захиралар бор”, деган эди Россия раҳбари.

Мамлакатдаги нодир ер металлари ҳақида гапирар экан, Путин бугунги кунда Россияда уларни ўзлаштириш бўйича етарли ишлар қилинмаётганини тан олди.

“Нодир, ноёб тупроқ металлари иқтисодиётнинг замонавий тармоқлари учун жуда муҳим таркибий қисм, жуда муҳим манба ҳисобланади. Ва биз ҳозирча бу йўналишда кам иш қиляпмиз. Биз кўпроқ иш қилишимиз керак”, деган эди у.

Австралиянинг “Small Caps” интернет-нашри АҚШ Геологик хизмати маълумотларига таяниб, 2024 йилда Россияда ноёб тупроқ металлари захиралари 3,8 миллион тоннани ташкил этганини ёзган. Нашрга кўра, бу кўрсаткич бўйича Россия дунёда Хитой, Бразилия, Ҳиндистон ва Австралиядан кейин бешинчи ўринни эгаллайди.

Эслатиб ўтамиз, олдинроқ АҚШ Президенти Дональд Трамп агар АҚШга нодир ер металлар етказиб бериш ваъда қилинса, Украинага ёрдам давом эттирилишини билдирган эди. Жорий йилнинг 14 февраль куни Мюнхен хавфсизлик конференциясида Украина Президенти Владимир Зеленский АҚШ билан металлар бўйича келишувни имзолашдан бош тортганди.