Трамп Украина бир кун Россияники бўлиши мумкинлигини айтди (видео)

АҚШ Президенти Дональд Трамп Россия Федерацияси томонидан ҳарбий тажовузга учраган Украина “бир кун Россияники бўлиб қолиши мумкин”лигини истисно этмайди. Бу ҳақда Трамп кеча, 10 февраль куни “Fox News” телеканалига берган интервьюсида сўз очди.

“Улар (украиналиклар) келишувга эришиши мумкин, эришмаслиги мумкин. Бир кун келиб улар россиялик бўлиб қолиши мумкин ёки ҳеч қачон россиялик бўлмаслиги мумкин”, дейди Трамп.

У, шунингдек, Украинанинг табиий ресурслари, хусусан, ноёб тупроқ металлари эвазига Украинага Америка ёрдамини тақдим этиш таклифини такрорлади.

“Мен уларга эквиваленти, масалан, 500 миллиард долларлик ноёб ер элементлари кераклигини айтдим. Ва улар асосан буни қилишга рози бўлишди, шунда ҳеч бўлмаганда ўзимизни аҳмоқдек ҳис қилмаймиз”, деди Оқ уй раҳбари.

Маълумки, Дональд Трамп ҳатто сайловолди ташвиқоти пайтида Россиянинг Украинага қарши урушини энг қисқа вақт ичида тугатишга ваъда берган, кейин эса урушни 100 кун ичида тугатиш имкониятига ишонч билдирган.

north_east

Трамп Украинани Путинга совға қиладими?

Вашингтон Украинага кейинги ёрдам ва бу мамлакатда тинчликка эришишнинг турли вариантларини муҳокама қилаётганини айтади. Трампнинг ғояларидан бири Украинага унинг ресурслари, жумладан, ноёб тупроқ металлари эвазига қурол етказиб беришни давом эттириш эди.

“Биз Украинага айтамизки, уларда жуда қимматли нодир ер металлари бор. Биз Украина билан шартнома тузмоқчимиз, унинг доирасида улар бизни ноёб металлар ва бошқа нарсалар билан таъминлайди”, деган эди АҚШ Президенти февраль ойи бошида.

Украина Президенти Владимир Зеленский бунга жавобан унинг мамлакати фойдали қазилма захираларини Ғарбга “бермоқчи эмас”лиги, балки Ғарб ҳамкорларига ўзаро манфаатли ҳамкорликни таклиф қилиётганини, бунда Қўшма Штатлар конлардан устувор фойдаланиш ҳуқуқига эга бўлишини айтди.

Зеленский, шунингдек, Киев иштирокисиз АҚШ ва Россия ўртасида бўлиши мумкин бўлган музокараларни таҳдид деб атади ва Украина хавфсизлиги кафолатлари ва қурол-яроғ етказиб беришни давом эттиришни талаб қилади. Зеленский 14-16 февраль кунлари бўлиб ўтадиган Мюнхен хавфсизлик конференциясида АҚШ вице-президенти Жеймс Дэвид Вэнс билан учрашиши кутилмоқда.  

Эслатиб ўтамиз, АҚШ Президенти Дональд Трамп Украина ва Россия бўйича махсус вакили Кит Келлогг яқин орада Украинага боришини айтганди. Келлоггнинг Украинага ташрифи шу ҳафта яъни 14-16 февраль кунларига тўғри келади. Шунингдек, Трамп Украина Президенти Владимир Зеленский билан телефон орқали гаплашиши мумкинлигини айтган.