Трамп Путинни Зеленскийдан устун қўйди

АҚШ Президенти Дональд Трамп Украина етакчиси Владимир Зеленский билан келишувга эришиш Россия Президенти Владимир Путин билан келишишга нисбатан анча қийин эканини билдирди. Бу ҳақда у NBC News телеканалига берган интервьюсида айтган.

Трампнинг таъкидлашича, у Зеленскийнинг келишув тузишни истамаётганидан ҳайратда.

“Зеленский нега келишув тузишни истамаётганидан ҳайронман. Зеленскийга айтинглар, у келишув тузсин, чунки Путин келишувга тайёр”, деган Трамп.

Нашрнинг ёзишича, Трампнинг бу баёнотлари АҚШ томонидан Россия нефтига нисбатан қўлланган айрим санкциялар юмшатилганидан кейин жаҳон етакчилари томонидан билдирилган танқидлар ортидан янграган. Вашингтон бу қадамни жаҳонда нефть нархларининг кескин ошишини юмшатиш мақсадида амалга оширган.

Март ойи бошида Владимир Зеленский Украина ҳарбийларининг Россия дронларини йўқ қилиш тажрибасидан фойдаланиб, АҚШ ва унинг иттифоқчиларига Яқин Шарқда Эрон дронларини тутишда ёрдам беришни таклиф қилган эди. Бироқ Трамп интервью давомида “бизга ёрдам керак эмас” деб жавоб бериб, “бизга ёрдами керак бўлмаган энг охирги одам – бу Зеленский”, деб қўшимча қилган.

Аввалроқ, март ойи бошида Трамп Зеленскийни Россия билан тинчликка эришиш йўлида тўсиқ деб атаган эди. Трамп шу билан бирга Владимир Путин келишув тузишни истаётганини, Украина раҳбари эса бу борада етарлича тайёрлик кўрсатмаётганини айтган. Оқ уй раҳбари музокаралар жараёни давом этаётганини ҳам таъкидлади.

Эслатиб ўтамиз, аввалроқ Эрон парламенти Миллий хавфсизлик комиссияси раиси Иброҳим Азизий ўзининг Х ижтимоий тармоғидаги саҳифасида Эрон, агар Украина Исроилга ҳарбий ёрдам кўрсатишни, хусусан, дронлар етказиб беришни давом эттирса, ушбу мамлакатга ракета зарбалари беришни бошлаши ҳақида ёзганди.