Трамп “Озодлик лойиҳаси” тўхтатилганини айтди

АҚШ Президенти Дональд Трамп Ҳормуз бўғозида кемаларни кузатишга асосланган “Озодлик лойиҳаси” вақтинча тўхтатилганини айтди. Бу ҳақда у Truth Social ижтимоий тармоғида ёзди.

Трампнинг айтишича, бу қарор Эрон билан келишувни якунлаш имкониятини кўриб чиқиш учун қабул қилинган. Унга кўра:

• қарор Покистон ва бошқа давлатлар илтимосига биноан қабул қилинган;
• АҚШ Эрон билан ҳарбий ҳаракатларда “катта муваффақиятга эришган”;
• томонлар ўртасида якуний келишувга эришиш бўйича сезиларли силжиш бор.

АҚШ Давлат котиби Марко Рубио эса аввалроқ “Эпик ғазаб” операцияси якунланганини ва барча мақсадлар бажарилганини билдирган. Унинг сўзларига кўра, Трамп Эрон билан кенг қамровли келишувга эришмоқчи.

Бир неча кун олдин Трамп АҚШ Ҳормуз бўғозида қолиб кетган кемаларга ёрдам беришини айтганди. У бу операцияни гуманитар деб атаб, денгизчиларга озиқ-овқат ва бошқа зарур нарсалар етказиб бериш зарурлигини таъкидлаган.

Бироқ Эрон томони кескин огоҳлантириш берган. Эрон Қуролли кучлари марказий штаби АҚШ кемалари бўғозга яқинлашса, уларга зарба беришга тайёр эканини билдирган.

Бундан ташқари, Трамп “Fox News”га берган интервьюсида агар Эрон АҚШ кемаларига ҳужум қилса, “Эронни ер юзидан йўқ қиламиз” деб таҳдид қилган. АҚШ Мудофаа вазири Пит Ҳегсет ҳам бундай ҳолатда кучли жавоб зарбаси берилишини айтган.

Эслатиб ўтамиз, аввалроқ Ҳормуз бўғозида АҚШнинг икки ҳарбий кемасига Эрон томонидан ракета, дрон ва ҳарбий катерлар билан ҳужум қилингани ҳақида хабар берилган эди. Пентагон эса кемалар зарар кўрмаганини маълум қилган.