Трамп Маскнинг ташкилотини муддатидан олдин тарқатиб юборди

SpaceX ва Tesla асосчиси, миллиардер Илон Маск бошчилигидаги Ҳукумат самарадорлиги департаменти (DOGE) ваколат муддати тугашига саккиз ой қолганида ўз фаолиятини тўхтатди. Бу ҳақда “Reuters” ташкилотнинг ходимларни бошқариш бўйича директори Скотт Купорга таяниб хабар берди.

“У мавжуд эмас”, деди Купор DOGE мақоми ҳақида сўралганда ва у энди “марказлаштирилган тузилма” эмаслигини қўшимча қилиб.

Агентликка кўра, Ходимларни бошқариш бошқармаси (федерал ҳукуматнинг инсон ресурслари агентлиги) DOGE’нинг кўплаб функцияларини ўз зиммасига олган. DOGE’нинг икки “таниқли” ходими ҳозирда август ойида Трампнинг буйруғи билан яратилган ва ҳукумат веб-сайтларига “чирой бериш” топширилган Миллий дизайн студиясида ишлайди.

“Reuters”нинг таъкидлашича, бу Трамп маъмуриятининг DOGE ҳалокати ҳақидаги биринчи оммавий изоҳидир, ваҳоланки, ёздан бери Президент ва унинг жамоаси бу бўлим энди амалда йўқлигини очиқ айтмоқда. Айни пайтда Трамп ўз муддатининг бошида DOGE 2026 йилнинг июлигача амалда бўлишини кўзда тутувчи фармонни имзолади.

Ҳукумат самарадорлиги департаменти (DOGE) Дональд Трамп 2025 йил 20 январда лавозимга киришганидан сўнг ўз фаолиятини бошлади. У Америка ҳукумати харажатларини кўриб чиқиш ва самарадорлигини ошириш органи сифатида яратилган. DOGE’ни бошқарган Илон Маск уни “бюрократия учун занжир” деб атади ва уни ижтимоий тармоқларида фаол равишда тарғиб қилди.

Департаментнинг иши охир-оқибат юзлаб давлат хизматчиларининг ишдан бўшатилишига олиб келди. Агентликлар, шунингдек, “Politico”, “The Associated Press” ва “The New York Times” каби либерал оммавий ахборот воситаларига обунани бекор қилди. DOGE давлат харажатларини ўнлаб миллиард долларга қисқартирганини даъво қилди, аммо ташқи молиявий экспертлар буни тасдиқламайди, чунки департамент ўз фаолияти тўғрисида жамоатчиликка батафсил ҳисобот тақдим эта олмади.

Эслатиб ўтамиз, аввалроқ Оқ уй раҳбари Нью-Жерсидаги гольф клубидан Вашингтонга кетаётганида журналистларга ўзининг собиқ иттифоқчиси, миллиардер Илон Маск ақлдан озганини иддао қилганди.