Трамп Корея яриморолидаги можарони ҳал қилмоқчи

АҚШ Президенти Дональд Трамп Корея яриморолида давом этаётган можарони ҳал қилиш ниятида. Бу ҳақда у бугун, 29 октябрь куни Жанубий Корея Президенти Ли Чжэ Мён билан музокаралар чоғида гапирган.

“Мен биламан, сизлар Корея яриморолида уруш ҳолатидасиз, аммо биз барчасини ҳал қилиш учун нима қилиш мумкинлигини муҳокама қиламиз”, дейди Оқ уй раҳбари.

Шунингдек, АҚШ Президенти ўзининг Жанубий Кореяга сафари давомида Шимолий Корея етакчиси Ким Чен Ин билан учрашмаслигини тасдиқлаган ва буни “мос бўлмаган вақт” билан изоҳлаган.

“Мен Ким Чен Инни жуда яхши биламан. Бизнинг муносабатимиз яхши. Шунчаки учрашув вақтини келишиб ололмадик”, дейди Трамп.

У, шунингдек, эртага, 30 октябрь куни Жанубий Кореяга Хитой раиси Си Цзиньпин келишини эслатиб, у билан учрашув режалаштирилганини маълум қилган.

“Мен у билан учрашишни интиқлик билан кутяпман. Бу сафарнинг асосий мақсади ҳам шундан иборат. Аммо бизда бошқа учрашувлар ҳам бўлади ва биз Ким Чен Ин ҳамда барча томонлар билан масалани ҳал қилиш учун жиддий ишлаймиз”, дейди Трамп.

Шунингдек, Жанубий Кореяда Дональд Трампга Корея яриморолидаги тинчликни ўрнатишдаги хизматлари эътирофи сифатида орден ва олтин тож нусхаси топширилган.

Эслатиб ўтамиз, аввалроқ  Япония Мудофаа вазири Синдзиро Коидзуми америкалик ҳамкасби Пит Ҳегсет билан бўлиб ўтган музокараларда Токио ва Вашингтоннинг минтақадаги ҳарбий иштирокини ошириш ва қўшма машғулотларни кучайтиришга келишиб олгани ҳақида хабар берилган эди.