Трамп хорижлик амалдорларга пора беришни қонунийлаштирди

АҚШ Президенти Дональд Трамп Америка компанияларига бошқа мамлакатлардаги амалдорлар ва сиёсатчиларга пора беришни тақиқловчи қонуннинг ижросини тўхтатиб туришни буюрди. Бу ҳақда Оқ уй матбуот хизмати хабар берди.

Кеча, 10 февраль куни Оқ уй раҳбари АҚШ Адлия департаментини 1977 йилдан бери амалда бўлган “Хорижий коррупция амалиёти тўғрисида”ги қонунни қўлламаслик мажбуриятини юкловчи фармойишни имзолаган ва унинг амалга оширилиши америкалик бизнеснинг хориждаги рақобатбардошлигини пасайтиришини айтган. 

Трампнинг фикрича, пора беришдан қўрқиб, америкалик бизнеслар ноқулай аҳволга тушиб қолган ва бошқа мамлакатлардаги хорижий рақобатчиларга ютқазмоқда.

“Бу Америка учун кўпроқ бизнесни англатади”, деди Трамп Овал кабинетда буйруқни имзолар экан.

Буйруқ матнида бу қонун АҚШ манфаатларига зарар етказиши айтилган.

“Дональд Трамп президент сифатидаги биринчи муддатида ҳам мазкур қонунни бекор қилмоқчи эди”, дея қайд этади “Reuters”.

У президент Жимми Картер даврида қабул қилинган қонунни “даҳшатли” деб атаган ва уни амалга ошираётгани учун америкаликларнинг устидан “бутун дунё кулиш”ини айтган.

Шу билан бирга, Трамп бош прокурор Пам Бондига қонун билан боғлиқ жорий ва ўтган ҳаракатларни кўриб чиқиш ва уни амалга ошириш бўйича янги тавсиялар тайёрлашни топширди.