Трамп Қозоғистонга келиши мумкин

АҚШ Президенти Дональд Трамп Қозоғистонга ташриф буюриш эҳтимоли борлигини маълум қилди. Бу ҳақда у кеча, 7 август куни Оқ уйда журналистлар саволига жавобан айтди.

Дастлаб, журналист Трампга: “Қозоғистонга ёки Марказий Осиёга ҳам ташриф буюрасизми?”, дея савол берган. Трамп эса бу бўлиши мумкинлигини айтган. 

“Мен у ерга боришим мумкин. Сизнинг Президентингиз яхши инсон. Унга салом айтинг”, дея Қозоғистон Президенти Қосим Жомарт-Тўқаевга салом йўллаган Трамп.

У, шунингдек, Қозоғистон раҳбари билан “зўр суҳбат” ўтказганини қўшимча қилган. 

Қайд этиш жоиз, 1 август куни Трамп 60 дан ортиқ давлат ва Европа Иттифоқидан келаётган товарларга 15 фоиздан 41 фоизгача бож жорий этиш ҳақидаги фармонга имзо чеккан эди. Қозоғистон учун бож ставкаси 25 фоиз этиб белгиланди. Бунга изоҳ сифатида Трамп Тўқаевга мактуб юборган, Қозоғистон раҳбари эса жавоб хатида келишувга эришилишига ишонч билдирган. Қозоғистон Савдо вазирлиги маълумотига кўра, ҳозирда Вашингтонга вазиятни ҳал қилиш бўйича таклифлар тақдим этилган. Мазкур божлар республиканинг АҚШга экспорт қилинадиган маҳсулотларининг қарийб 5 фоизига таъсир қилади.

Эслатиб ўтамиз, 5 сентябрь куни Ўзбекистон Президенти Шавкат Мирзиёевнинг Америка Қўшма Штатлари Президенти Дональд Трамп билан телефон орқали мулоқоти бўлиб ўтганди. Мирзиёев суҳбат давомида Трампни Ўзбекистонга таклиф қилган.