Трамп Гренландиянинг тарафини олаётган давлатларга таҳдид қилди

north_east

Гренландия келажаги кимнинг қўлида?

АҚШ Президенти Дональд Трамп Гренландия устидан Америка назоратини ўрнатиш режаларини қўллаб-қувватламайдиган давлатларга нисбатан савдо божлари жорий этишга тайёр эканини билдирди. Бу ҳақда у кеча, 16 январь куни Оқ уйда бўлиб ўтган тадбирда сўз очди.

“АҚШнинг Гренландияга бўлган даъволарига рози бўлмаган давлатларга қарши божлар жорий қилишим мумкин, чунки Гренландия бизга миллий хавфсизлик учун зарур”, деган Трамп ва ўзини “божлар қироли” деб атаган.

У бошқа тафсилотларни очиқламаган.

Қайд этиш жоиз, сўнгги ҳафталарда Дональд Трамп бир неча бор Даниянинг автоном ҳудуди бўлган Гренландияга АҚШнинг даъвоси борлигини очиқ айтиб келмоқда. У оролни эгаллаш заруратини “Гренландия атрофида Россия ва Хитой кемалари бор” деган даъво билан изоҳлаган. Шунингдек, Оқ уй Трамп Гренландия устидан назоратни қўлга киритишнинг турли вариантларини, жумладан, қуролли кучлардан фойдаланиш эҳтимолини ҳам кўриб чиқаётганини билдирган. ОАВ маълумотларига кўра, Трамп маъмурияти оролни сотиб олиш вариантини ҳам муҳокама қилмоқда.

Жорий йилнинг 15 январь куни Европанинг етти давлати минтақадаги хавфсизликни мустаҳкамлаш ҳамда Данияга 2026 йил охирида режалаштирилган йирик ҳарбий машғулотларга тайёргарлик кўришда ёрдам бериш мақсадида разведка миссияси доирасида Гренландияга ўз ҳарбийларини юборишини эълон қилди. Бунга жавобан Оқ уй матбуот котиби Кэролайн Левитт Европа қўшинларининг Гренландияга юборилиши Трампнинг бу ҳудудни Америка ҳудудига айлантириш истагига таъсир қилмаслигини айтди.

Эслатиб ўтамиз, аввалроқ АҚШ билан орол келажаги бўйича келишувга эришилмаган учрашувдан сўнг Гренландия Ташқи ишлар вазири Вивиан Мотсфельдт Дания Ташқи ишлар вазири Ларс Лёкке Расмуссен билан бирга KNR радиостанцияси эфирига чиқиб, суҳбат чоғида ҳиссиётларга берилиб, йиғлаб юборганди.