Трамп Эронга қарши урушнинг дастлабки натижаларини очиқлади

Можаро бошланганидан бери АҚШ Эрон ҳудуди бўйлаб 7 мингдан ортиқ нишонга зарба берди. Зарба берилган объектларнинг аксарияти ҳарбий ва тижорий объектлар бўлган. Бу ҳақда АҚШ Президенти Дональд Трамп айтиб ўтди.

Трамп яна Эроннинг Харг  оролини тилга олиб, АҚШ у ерда нефть объектларидан ташқари деярли ҳамма нарсани йўқ қилганини такрорлаган. Шу билан бирга, агар керак бўлса, келажакда нефть объектларига ҳам зарба берилиши мумкинлигини айтган.

“Биз қувурларни қолдирдик. Буни қилишни хоҳламагандик, лекин агар керак бўлса, беш дақиқа ичида буни қила оламиз”, деган Трамп.

Унинг сўзларига кўра, АҚШ бу ҳудудларга атайлаб зарба бермаган, чунки келажакда мамлакатни тиклаш имконияти қолишини хоҳлаган.

Шунингдек, Трампнинг айтишича, Эроннинг минага мўлжалланган барча кемалари йўқ қилинган. Уларнинг сони 30 дан ортиқ бўлган. Президент Эрон қўлида унчалик кўп ракета қолмаганини ҳам таъкидлаган.

Трамп Ҳормуз орқали нефть етказиб беришдаги узилишлар ҳақида ҳам гапирган. Эрон можаро бошланганидан кейин бу бўғозни ёпган эди. АҚШнинг ўзи у орқали 1 фоиздан кам нефть импорт қилишини айтган.

Бироқ у бошқа давлатлар, жумладан Япония ва Корея бу йўл орқали нефть етказиб беришга анча кўпроқ боғлиқлигини тан олган. Шу сабабли АҚШ улар бўғозда хавфсиз денгиз қатновини таъминлаш учун ўз кучларини юборишини истамоқда.

Трамп АҚШ иттифоқчиларини бу миссияда қатнашишдан бош тортгани учун танқид қилган. Унинг фикрича, улар ўнлаб йиллар давомида АҚШ хавфсизлик ёрдамини олган бўлса-да, етарлича содиқлик кўрсатмаяпти.

Шу билан бирга, Трамп кўплаб давлатлар аллақачон йўлга чиққани ҳақида хабар берганин, бироқ қайси мамлакатлар эканини аниқлаштирмаган.

АҚШ ва Исроил февраль охирида Эронга қарши қўшма ҳарбий операция бошлаган эди. Ўшандан бери томонлар бир-бирига зарбалар бермоқда. Теҳрон эса Форс кўрфази мамлакатларидаги АҚШ ҳарбий объектларига ҳамда Исроилга ракета ва дронлар билан жавоб бермоқда.

Можаро фонида Яқин Шарқда аэропортлар ёпилиши сабабли авиақатновларда узилишлар юзага келди. Шунингдек, Эрон Ҳормуз бўғозини ёпгани туфайли дунёда энергия ресурслари нархи кескин ошди.

Эслатиб ўтамиз, аввалроқ АҚШ ва Исроилнинг Эронга қарши ҳарбий операцияси сентябргача давом этиш эҳтимоли мавжудлиги ҳақида хабар берилганди.