Трамп бир центлик танга зарбини тўхтатишни буюрди

АҚШ Президенти Дональд Трамп мамлакатда бир центлик тангалар (пенни) чиқарилишини тўхтатиш бўйича АҚШ Молия вазири Скотт Бессентга топшириқ берганини эълон қилди. Бу ҳақда у ўзининг Truth Social ижтимоий тармоғидаги саҳифасида маълум қилди.

“АҚШ жуда узоқ вақт давомида пенни зарб қилди, лекин у бизга ҳар бири икки центдан ҳам қимматга тушмоқда. Бу шунчалик исрофгарчилик! Мен АҚШ Молия вазирига янги пенни ишлаб чиқаришни тўхтатиш бўйича топшириқ бердим. Келинг, ушбу харажатларни давлат бюджетидан чиқариб ташлаймиз, ҳатто битта пеннидан бошлаб бўлса ҳам!” деб ёзди Трамп.

CNN хабарига кўра, тангаларни ишлаб чиқариш таннархининг ошишига асосий сабаб металл нархининг кўтарилиши бўлиб, бу жараённи иқтисодий жиҳатдан самарасиз қилиб қўймоқда.

“Экспертларнинг фикрича, пеннидан воз кечиш бизнесга ҳам фойда келтириши мумкин, чунки бу сотувчилар ва кассирларнинг вақтини тежайди”, дейилади телеканал материалида.

Эслатиб ўтамиз, аввалроқ Дональд Трамп 2028 йилда Лос-Анжелесда бўлиб ўтадиган Олимпиадада трансгендерларнинг аёллар мусобақаларида иштирок этмаслигини таъминлаш учун чоралар кўришга ваъда бериб, трансгендерларнинг аёллар ва қизлар мусобақалашадиган таълим муассасаларидаги спорт тадбирларида иштирок этишини тақиқловчи фармонни имзолаганди.