Трамп ҲАМАСга 5 октябргача муҳлат берди

АҚШ Президенти Дональд Трамп ҲАМАСга унинг Ғазонинг келажагига оид режаси бўйича 5 октябрь куни маҳаллий вақт билан соат 18:00 гача келишувга келиш учун муҳлат берди ва буни гуруҳ учун “сўнгги имконият” деб атади. Бу ҳақда у бугун, 3 октябрь куни Truth Social'да ёзди.

“Якшанба куни соат 18:00 (Вашингтон вақти) гача ҲАМАС билан келишувга эришилиши керак. Ҳар бир давлат розилик берди! Агар бу СЎНГГИ ИМКОНИЯТ келишувига эришилмаса, ҲАМАСга қарши дунё ҳеч қачон кўрмаган даражадаги ДЎЗАХ бошланади” деб ёзди Трамп. 

Трамп 30 сентябрь куни ҲАМАСга 20 моддадан иборат ҳужжатни қабул қилиш учун уч-тўрт кун муҳлат берганини айтган эди. Бу ҳужжат гуруҳнинг қуролсизланишини талаб қилади — ҲАМАС бу талабни илгари рад этган. Гуруҳга яқин манбага кўра, ҲАМАС таклифни ҳозирча кўриб чиқмоқда.

 Режага кўра, қуйидагилар назарда тутилган:

• Дарҳол оташкесим эълон қилиш;
• ҲАМАС томонидан ушлаб турилган барча гаровга олинганларни Исроил томонидаги фаластинлик маҳбусларга алмаштириш;
• Исроил қўшинларининг Ғазодан босқичма-босқич чиқарилиши;
• ҲАМАСнинг қуролсизлантирилиши;
• Халқаро ташкилот томонидан бошқариладиган ўтиш ҳукумати ташкил этилиши.