Тожикистонлик аёл террорчиликда айбланиб ҳибсга олинди

Санкт-Петербургнинг Петроград туман суди Тожикистон фуқаросини 40 кунга ҳибсга олди. Маълум қилинишича, у ўз ватанига экстрадиция қилиниши мумкин. 

“Петроград туман суди Нагора Самиевани Тожикистон Республикасида жиноий ташкилот тузиш ва экстремистик фаолиятни ташкил этишда айблаб ҳибсга олди”, дейилади расмий ахборотларда. 

Гумонланувчи 29 декабрь куни қўлга олинган. Суд унинг Тожикистон ҳуқуқ-тартибот идоралари илтимосига биноан Интерполнинг халқаро қидирув рўйхатига киритилганини аниқлади. 2025 йил март ойида унга жиноий иш бўйича айблов қўйилган. Хорижий ҳуқуқ-тартибот идораларининг маълумотларига кўра, ҳибсга олинган шахс Туркияда бўлганида Тожикистонда тақиқланган Ҳизбут-Таҳрир ал-Исломий экстремистик ташкилотининг ғояларини тарғиб қилган ва унинг материалларини "Ислом халифалиги"ни яратиш мақсадида интернетда тарқатган.  

Айбланувчининг ҳаракатлари Россия Жиноят кодексининг 210-моддаси 1-қисми (жиноий гуруҳ тузиш) ва 282.2-моддаси 1-қисми (экстремистик ташкилот фаолиятини ташкил этиш)га мос келиши аниқланган. 

“Суд экстрадицияга тўсқинлик қилувчи ҳеч қандай асос топмади. Аёл судьяга ҳеч нарса билмаслигини ва унга туҳмат қилиб, таъқиб қилган собиқ эри ҳамма нарсада айбдор эканлигини билдирган. Суд уни экстрадиция қилиш учун 40 кунлик судгача қамоққа олишни буюрди”, дейилади баёнотда.

Маълумот учун, 2024 йилнинг 22 февраль куни “Крокус Сити Ҳолл” концерт залига уюштирилган ҳужум ва унда 149 кишининг қурбон бўлиши ортидан Россияда тожикистонликларга нисбатан таъқиб ва нафрат ортган. Теракт ижрочиси сифатида тожикистонлик Шамсиддин Фаридуни кўриб келинмоқда. Унинг ўзи ҳам 2025 йилнинг декабрь ойи ўрталарида бошланган суд мажлисида айбига иқрор бўлган.