Тошкентдан Исроилга парвозлар вақтинча тўхтатилди

Исроилнинг Тель-Авив халқаро аэропортида ҳаво ҳудудидан фойдаланиш бўйича жорий этилган чекловлар сабабли жорий йилнинг 16 июнидан 30 июнигача Тошкент – Тель-Авив– Тошкент йўналишидаги рейслар вақтинча тўхтатилди. Бу ҳақда “Ўзбекистон ҳаво йўллари” хабар берди.

Қайд этилишича, бекор қилинган рейсларнинг йўловчиларнинг авиабилетлар бўйича мажбурий қайтариб олиш ёки кейинги саналарга бепул қайта бронь қилиш учун мурожаат қилишлари мумкин.

Эслатиб ўтамиз, аввалроқ Исроилнинг Тель-Авив шаҳридаги Бен-Гурион аэропорти ва минтақа ҳаво маконининг вақтинча ёпилиши муносабати билан жорий йилнинг 15 июнь куни амалга оширилиши керак бўлган 9S 501/502 Самарқанд-Тель-Авив рейси бекор қилинганди. Шунингдек, Эрон ҳаво ҳудудининг ёпилиши муносабати билан Тошкентдан учиши керак бўлган бир нечта рейслар бекор қилинганди. Булар “Flydubai” авиакомпаниясининг Дубай - Тошкент - Дубай йўналиши бўйича FZ-1945/1946 рейслари, “Air Arabia” авиакомпаниясининг Шаржа - Тошкент - Шаржа йўналиши бўйича G9-270/271 рейслари ҳамда “Asia Union” авиакомпаниясининг Тошкент - Мадина - Тошкент йўналиши бўйича 7q-141/142 рейслари эди.