Тошкентда реклама баннерлари бузилиши ноқонуний — Бизнес-омбудсман

north_east

Тошкентлик тадбиркорлар овози Президентга етиб бормагач, реклама баннери орқали мурожаат йўллади

Апрель ойидан бошлаб, ижтимоий тармоқларда Тошкент шаҳрида реклама конструкциялари бузилиши масаласи жамиятнинг диққат-эътиборини ўзига тортмоқда. Бир гуруҳ тадбиркорлик субъектлари ноодатий усул орқали, яъни Президентдан ёрдам сўраб, ўзларига тегишли бўлган реклама объектларига мурожаатларини жойлаштиришди.

Жамоатчилик диққат марказига тушган ушбу масала Бизнес-омбудсманнинг назоратига олинганлиги тўғрисида расмий баёнот берилган эди. 

Бизнес-омбудсман ўтказган ўрганишларнинг дастлабки натижаларига кўра, тадбиркорларга тегишли реклама конструкцияларининг демонтажи Халқ депутатлари Тошкент шаҳар Кенгашининг 2021 йил 27 мартдаги 323/37-6-сонли “Тошкент шаҳрида ташқи реклама соҳасидаги фаолиятни тартибга солиш тўғрисида”ги қарори асосида амалга оширилмоқда.

Бизнес-омбудсман томонидан юқоридаги қарорнинг қонунийлиги ўрганилганда, “Норматив-ҳуқуқий ҳужжатлар тўғрисида”ги қонунининг 21 ва 22-моддалари талабларига асосан ушбу қарор лойиҳаси адлия органларида экспертизадан ўтказилмагани аниқланган.

Шундан келиб чиқиб, Ўзбекистон Республикаси Олий Мажлиси Сенатидан Халқ депутатлари Тошкент шаҳар Кенгашининг юқоридаги қарорнинг қонунийлигига баҳо бериш ҳамда ваколат доирасида уни қайта кўриб чиқилишида амалий ёрдам бериш сўралган.

Айни дамда, ушбу ҳолат юзасидан қўшимча ўрганишлар олиб борилмоқда.