Тошкентда метро ходимини қўрқитиб, ундан пул олган шахс ушланди

Тошкент шаҳрида метрополитен ходимига таҳдид қилиб, ундан пул ундириб келган шахс ҳибсга олинди. Бу ҳақда “Тошкент метрополитени” ДУК хабар берди.

Қайд этилишича, “Режим тартибини таъминлаш” хизмати ходимлари томонидан аввал Жиноят кодексининг 166- (талончилик) ва 169-моддалари (ўғирлик) билан судланган фуқаро М.А. “Ҳаракат” хизмати “Қўйлиқ” бекати навбатчиси А.А.нинг шахсий ҳаётига таҳдид қилгани ва зўравонлик йўли билан уни қўрқитиб, 500 минг сўм миқдори пул талаб қилгани тўғрисида маълумот олинган. Шундан сўнг Ўзбекистон Республикаси ИИВ Метрополитенда хавфсизликни таъминлаш бошқармаси масъул ходимларига хабар берилган. 

Натижада кеча, 10 апрель куни Ўзбекистон Республикаси ИИВ Метрополитенда хавфсизликни таъминлаш бошқармаси ходимлари томонидан “Тошкент метрополитени” ДУК “Режим тартибини таъминлаш” хизмати билан ҳамкорликда ўтказилган тадбирда фуқаро М.А. метрополитеннинг “Ҳаракат” хизмати бекат навбатчиси А.А.дан “Қўйлиқ” метро бекатида товламачилик йўли билан навбатдаги 500 минг сўм пулни олган вақтда ашёвий далиллар билан қўлга олинган.

Билдирилишича, ҳозирда М.А. ҳуқуқни муҳофаза қилувчи органлар томонидан ўрнатилган тартибда ҳибсга олинган.

Эслатиб ўтамиз, аввалроқ Самарқанд шаҳрида 44 ёшли эркакни пичоқ билан қўрқитиб, 1900 долларини ўғирлаган 23, 24 ва 17 ёшли йигитлар ушланган эди.