Тошкентда iPhone учун танишини жароҳатлаган шахс ушланди

Тошкент шаҳрида iPhone 17 Pro Max сабабли танишининг юзини ўткир тиғли жисм билан жароҳатлаган шахс ушланди. Бу ҳақда давлат хавфсизлик хизмати хабар берди.

Тошкент шаҳрида яшовчи, 2003 йилда туғилган шахс муқаддам Жиноят кодексининг 169- (ўғрилик), 104-(қасддан баданга оғир шикаст етказиш), 227-(Ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш), 168-моддалари (фирибгарлик) билан бир неча маротаба судланган бўлсада, тўғри йўлга ўтмасдан, ҳозирда “Малика” савдо мажмуасида телефон олди-сотдиси билан шуғулланиб, ўзгаларга нисбатан безорилик, товламачилик ва зўравонлик ҳаракатларини амалга ошириб келган.

Хусусан, у аввалдан ўзига таниш бўлган фуқарога пулини кейинроқ бериш шарти билан 4 дона iPhone 17 Pro Max русумли телефонини сотган бўлсада, лекин ўртада юзага келган келишмовчилик туфайли ўткир тиғли жисм билан унинг юз ва қорин қисмига кўп маротаба уриб, жиддий тан жароҳати етказган.

Билдирилишича, ҳозирда у қўлга олиниб, Жиноят кодексининг 277-моддаси (безорилик) билан жиноят иши қўзғатилган.

Эслатиб ўтамиз, аввалроқ Хоразм вилоятида ўзидан “кўча” ясаб олган, “Жомми Даритал”, “Малиш” ва “Расул қилич” номлари билан танилган уч кишига жиноят иши қўзғатилиб, улар қамоққа олинганди.