Тель-Авивдан Венага учган самолёт Болгарияда фавқулодда қўнди

Исроилнинг Тель-Авив шаҳридан Австрия пойтахти Венага учаётган Austrian Airlines авиакомпанияси самолёти бортда бомба борлиги ҳақидаги аноним хабардан сўнг Болгарияда фавқулодда қўнди. Бу ҳақда Исроилнинг “KAN News” нашри хабар берди.

Маълум қилинишича, самолёт кеча, 18 октябрь куни кечқурун Бен-Гурион аэропортидан ҳавога кўтарилган. Бортда бомба борлиги ҳақидаги хабар келиб тушгач, экипаж парвозни давом эттирмасликка қарор қилиб, София аэропортига қўнган.

Болгария Транспорт ва коммуникациялар вазирлиги маълумотига кўра, экипаж Руминия чегараси яқинида портлаш хавфи ҳақидаги хабарни олган ва фавқулодда қўниш тўғрисида қарор қабул қилган.

Austrian Airlines таркибига кирувчи Lufthansa Group авиация гуруҳи ҳам самолёт таҳдид ҳақидаги хабар сабаб қўнганини тасдиқлаган. Самолёт бортида 51 нафар йўловчи ва олти нафар экипаж аъзоси бўлган.

Компания маълумотига кўра, самолёт хавфсизлик хизматлари томонидан текширилган. Текширувлар якунлангач, йўловчилар муқобил рейс орқали Венага етказилиши режалаштирилган.

Маълумотларга кўра, самолёт бортида Бирлашган Миллатлар Ташкилотида чиқиш қилиши керак бўлган ёшлар делегацияси ҳам бўлган.

Эслатиб ўтамиз, аввалроқ Дубайдан Тель-Авивга учаётган Flydubai йўловчи самолёти фавқулодда олиб қочиш сигналини юбориб, Саудия Арабистони ҳудуди томон бурилгани ҳақида хабар берилган эди. Кейинроқ самолёт хавфсиз қўндирилди ва уни қулатишга уринган бошқа учувчи қўлга олинди.