“Тайёргарлик кўряпмиз”. Куба Президенти АҚШ билан эҳтимолий уруш ҳақида гапирди

Куба Президенти Мигель Диас-Канель Оқ уй раҳбари Дональд Трампнинг мамлакат шаънига айтган баёнотларига муносабат билдирди ва АҚШ билан юзага келиши мумкин бўлган низо ҳақида фикр билдирди. Бу ҳақда у “Sky News”га берган интервьюсида сўз очди.  

Нашрнинг хабар беришича, Мигель Диас-Канель Куба АҚШ билан ҳарбий тўқнашув юз берган тақдирда ўз суверенитетини ҳимоя қилишга тайёр эканини маълум қилган.

“Биз урушни хоҳламаймиз, лекин ундан қўрқмаймиз ҳам. Тўсатдан ғафлатда қолмаслигимиз ва мағлубиятга учрамаслигимиз учун унга тайёргарлик кўряпмиз”, дейди Куба раҳбари.

Унинг сўзларига кўра, Дональд Трампнинг Куба ҳақидаги баёнотлари ва Америка маъмуриятининг риторикаси Гавана жиддий қабул қилаётган таҳдидли сигналдир. Шу билан бирга, Куба Президенти ҳужум уюштирилган тақдирда, мамлакат халқи “бирдамлик, қатъиятлилик ва ўз суверенитетини ҳимоя қилиш билан жавоб қайтаришига” ишонч билдирган.

Шунингдек, Мигель Диас-Канель тўқнашувнинг олдини олишни устувор вазифа деб ҳисоблайди ва Вашингтон билан мулоқот қилиш тарафдори эканини таъкидлаган.

Эслатиб ўтамиз, аввалроқ АҚШ Президенти Дональд Трамп Кубага таҳдид қилиб, Эронга қарши ҳужум якунланганидан кейин Қўшма Штатлар Куба билан “шуғулланишини” маълум қилган эди.