Тарихдаги энг катта нефть захираси бозорга чиқарилади – ОАВ

Халқаро энергетика агентлиги тарихдаги энг катта ҳажмдаги стратегик нефть захираларини бозорга чиқаришни қарор қилди. Бу ҳақда “The Guardian” хабар берди.

Маълум қилинишича, агентлик 400 миллион баррель нефтьни фавқулодда захиралардан чиқаришни режалаштирмоқда. Бу ташкилот ихтиёридаги умумий захираларнинг қарийб учдан бир қисмига тенг. Энергетика соҳасидаги глобал регулятор ҳисобланган агентликнинг 32 та аъзо давлати ушбу қарорни бир овоздан қўллаб-қувватлаган.

Бу чора АҚШ ва Исроилнинг Эронга қарши уруши ҳамда Ҳормуз бўғозининг амалда ёпилиши оқибатида нефть бозорида юзага келган кескин вазиятни юмшатиш мақсадида кўрилмоқда. Бу бўғоз орқали жаҳон нефть таъминотининг тахминан тўртдан бир қисми ўтади.

Аввалроқ, Япония ҳукумати 18 мартдан бошлаб давлат ва хусусий захираларидан тахминан 80 миллион баррель нефтьни бозорга чиқаришини маълум қилган.

Германия ҳам мазкур ташаббус доирасида 19,51 миллион баррель хом нефть захираси ишлатишини эълон қилди.

Шунингдек, Катта еттилик давлатлари энергетика вазирлари стратегик нефть захираларидан фойдаланишни принципиал жиҳатдан қўллаб-қувватлашларини билдирган.

АҚШ ҳам ўз стратегик захирасидан 172 миллион баррель нефть чиқаришини маълум қилди.

Халқаро энергетика агентлиги бунга ўхшаш фавқулодда чорани сўнгги марта 2022 йилда, Россиянинг Украинага босқини бошланганидан кейин қўллаган эди. Ўшанда бозорга 182 миллион баррель нефть чиқарилган.

Маълумотларга кўра, Ҳормуз бўғози орқали савдо тўхташи натижасида жаҳон нефть бозори ҳар куни тахминан 15 миллион баррель нефтьни йўқотмоқда.