Таниқли журналистни ўлдириш учун 150 минг евро тўлаган бизнесмен ушланди

Мальтанинг энг бой тадбиркорларидан бири, Йорген Фенек устидан 2017 йилда таниқли суриштирувчи журналист Дафне Каруана Галициянинг қотиллигини уюштирганлик айблови бўйича суд жараёни бошланди. Прокуратура маълумотига кўра, Фенек журналистни ўлдириш учун уч нафар қотилга 150 минг евро тўлаган. Бу ҳақда “The Guardian” хабар берди.

Қайд этилишича, 44 ёшли Фенек “Hilton Malta” меҳмонхонаси ва казиносини ўз ичига олган йирик мулкчилик империяси вориси ҳисобланади. У судда ўзига қўйилган айбларни рад этиб, ўзини айбсиз деб ҳисоблашини билдирган.

Дафне Каруана Галиция 2017 йил 16 октябрь куни уйидан чиқиб кетаётганида автомобилига олдиндан ўрнатилган портловчи мослама ишга туширилиши оқибатида ҳалок бўлган. Журналист коррупция, ҳукумат ва йирик бизнес вакилларига оид суриштирувлари билан танилган бўлиб, унинг ўлими Мальта ва бутун Европада катта шов-шувга сабаб бўлган.

Айблов хулосасига кўра, қотиллик режаси 2017 йил апрелида тузилган. Прокуратура Фенек ўзининг таниши – таксичи ва букмекер Мелвин Теума орқали қотилларни ёллаганини, дастлаб 30 минг евро олдиндан тўланганини таъкидлаган. Кейинчалик мамлакатда парламент сайловлари эълон қилингач, режа вақтинча тўхтатилган, аммо сайловдан сўнг уни амалга оширишга кўрсатма берилган.

Тергов маълумотларига кўра, Фенек журналист унинг қариндоши, кейинроқ эса шахсан ўзи ҳақида фош этувчи материал эълон қилиш арафасида бўлгани учун қотилликни тезлаштиришни талаб қилган.

Фенек мазкур иш бўйича жавобгарликка тортилган етти кишидан суд олдига чиққан сўнгги айбланувчи ҳисобланади. Аввалроқ улардан беш нафари айбдор деб топилган, яна бир киши эса терговга ҳамкорлик қилгани эвазига авф этилган.

Эслатиб ўтамиз, аввалроқ Саудия Арабистонининг “Al Arabiya” телеканалининг Яманда фаолият юритган мухбири Муҳаммад Айда автомобилга ўрнатилган бомба портлаши оқибатида ҳалок бўлган эди.