Таниқли пропагандачи Тигран Кеосаян вафот этди

Таниқли кинорежиссёр, телерадио бошловчи ва пропагандачи Тигран Кеосаян 59 ёшида вафот этди. Бу ҳақда унинг рафиқаси Маргарита Симоньян ўзининг Telegram-каналида маълум қилди. 

“Бугун тунда Тигран Яратганнинг ҳузурига кетди. Дуода бўлганларнинг барчасига раҳмат. Ҳозир ҳеч ким менга ҳам, оиламга ҳам қўнғироқ қилмасин. Ҳаммага катта раҳмат”, деб ёзди Симоньян.

Қайд этиш жоиз, жорий йилнинг январида Тигран Кеосаян клиник ўлимдан сўнг комага тушиб қолган эди.

Маълумот учун, Кеосаян 1966 йил 4 январда туғилган. У машҳур режиссёр ва сценарист Эдмонд Кеосаяннинг ўғли (у “Қўлга тушмас қасоскорлар” филми билан танилган). Тиграннинг акаси Давид эса продюсер ва сценарист ҳисобланади.

1984 йилда Кеосаян С.А.Герасимов номидаги Бутунроссия давлат кинематография университетининг режиссёрлик факультетига ўқишга кирган. Унинг курсдошлари орасида Фёдор Бондарчук ҳам бўлган. У билан бирга қўшиқ клипларини суратга ола бошлаган ва Наталия Ветлицкая, Ирина Аллегрова, Михаил Шуфутинский ва бошқа санъаткорларга видеороликлар ишлаб чиққан.

Кеосаяннинг илк тўлиқ метражли филми “Катка ва Шиз” 1992 йилда экранларга чиққан. Шунингдек, у “Бечора Саша”, “Кумуш лола”, “Қрим кўприги. Севги билан яратилган!”, “Ялта-45”, “Денгиз. Тоғлар. Керамзит” каби фильмлар ва сериалларни суратга олган.

Бундан ташқари, Кеосаян оммавий ахборот воситаларида фаолият юритган. У REN TV телеканалида “Тигран Кеосаян билан кечқурун” ва “Жим туриш кифоя!” ток-шоуларини, NTV каналида “Халқаро пилорама” дастурини олиб борган.

Эслатиб ўтамиз, 2022 йил апрелида у ўзининг телекўрсатувида Қозоғистон ва унинг аҳолиси ҳақида ҳақоратли сўзлар айтган эди. Қозоғистон Ташқи ишлар вазирлиги бу баёнотларга эътибор қаратиб, бундай чиқишлар Россия ва Қозоғистон ўртасидаги дўстона муносабатлар муҳитини бузишини билдирган. Кейинчалик ТИВ матбуот котиби Кеосаян мамлакатга кириши исталмаган шахслар рўйхатига киритилишини айтган ва унга “персона нон грата” мақоми бериш жараёни бошланган.