Сербияда талабалар Президент истеъфосини талаб қилди

Сербиянинг Белград шаҳрида жойлашган марказий Славия майдонида талабалар мухолифат митингини ўтказиб, Президент Александр Вучичнинг истеъфосини ва муддатидан олдин сайловлар ўтказилишини талаб қилди. Бу ҳақда RTS хабар берди.

Маълум қилинишича, митинг 2024 йилнинг 1 ноябрь куни Нови-Сад вокзалида бетон соябон қулаб, 16 киши ҳалок бўлган фожиа ортидан бошланган норозиликлар билан боғлиқ.

Митинг 28 июнь куни маҳаллий вақт билан соат 19:00 да бошланган ва 19:11 дан 19:27 гача ҳалок бўлганлар хотирасига 16 дақиқа сукут сақланган. “Reuters” агентлигининг хабарига кўра, митингга ўн минглаб талабалар ва коррупцияга қарши чиқаётган фуқаролар йиғилган. Иштирокчилардан бири Никола Марчетич сўзга чиқиб, бу митинг халқ манфаатига хизмат қилмайдиган режимга қарши кураш эканини таъкидлаган.

Сербия Ички ишлар вазирлигининг маълум қилишича, Славия майдонига 36 мингга яқин одам йиғилган.

Қайд этиш жоиз, 21 июнь куни Президент Вучич Сербияда ёшлар мамлакатни тарк этиши тарихдаги энг юқори даражага чиққанини айтган. Бу кўчишлар Европа давлатларига, хусусан Словения, Хорватия, Австрия ва Венгрияга йўналтирилган. Бу ҳолат Нови-Саддаги фожиа ортидан бошланган норозиликлар фонида содир бўлмоқда.

Эслатиб ўтамиз, аввалроқ Сербия парламентида мухолифат депутатлари пиротехника воситаларидан фойдаланган ҳолда муштлашганди. Жанжал сессия бошланганидан тахминан бир соат ўтиб юзага келган.