Тадбиркорлар учун электр ва газ бўйича олдиндан тўлов 15 фоизга туширилади

Жорий йил 1 ноябрдан бошлаб Ўзбекистонда тадбиркорлар учун электр ва газ бўйича олдиндан тўлов 15 фоизга туширилади. Бу ҳақда Президент кеча, 27 август куни қабул қилган “Ўзбекистон Республикаси Президентининг тадбиркорлар билан VI очиқ мулоқотида белгиланган вазифаларни амалга ошириш чора-тадбирлари тўғрисида”ги фармонда сўз боради.

Ҳужжатга кўра, 2026 йил 1 ноябрдан бошлаб электр энергияси ва табиий газ учун олдиндан тўлов миқдори 15 фоиз этиб белгиланади. Мазкур тартиб тадбиркорлик субъектлари учун коммунал ресурслар бўйича дастлабки тўлов юкини камайтиришга қаратилган.

Бундан ташқари, фармонда электр энергияси ва газ сарфи тўғрисидаги электрон ҳисоблагичлар маълумотларини электр тармоғи ва газ таъминоти корхоналарига мажбурий электрон кўринишда юбориш тартибини бекор қилиш ҳам назарда тутилган.

Шу билан бирга, жорий йил 1 ноябрдан электр энергияси ва табиий газ ҳисобини юритиш ҳамда назорат қилишнинг автоматлаштирилган тизимига (ЭҲҲАТ) ва табиий газ ҳисобини юритишнинг автоматлаштирилган тизимига уланган, шунингдек, ҳисоблагич маълумотларини масофадан узатиш имкониятига эга тадбиркорлик субъектлари томонидан электр ва газ таъминоти корхоналарига маълумотларни юбориш талаби бекор қилинади.

Эслатиб ўтамиз, аввалроқ Ўзбекистонда кичик тадбиркорлик субъектларини ҳар қандай текширишга 3 йил муддатга мораторий жорий этилиши ва жорий йил 31 декабргача кичик ва ўрта тадбиркорлик субъектлари учун “Иккинчи имкон” иқтисодий амнистияси эълон қилингани ҳақида хабар берилган эди. Шунингдек, 2027 йил 1 январдан бошлаб тадбиркорларга молиявий жарима қўллашда “Биринчи хато учун – огоҳлантириш” қоидаси жорий этилади.