Тадбиркор аёлга шилқимлик қилган Солиқ инспекцияси мансабдори ишдан олинди

Сирдарё вилояти, Янгиер шаҳар Солиқ инспекцияси раҳбари тадбиркор аёлга шилқимлик қилгани ортидан ишдан олинди. Бу ҳақда “Эзгулик” инсон ҳуқуқлари жамияти раҳбари Абдураҳмон Ташанов маълум қилди.

Қайд этилишича, Солиқ инспекцияси раҳбари А.Б. эри мусофирда бўлган тадбиркор аёлга нисбатан маиший характердаги, шилқимона SMS-хабарлар ёзиб, бир неча ой давомида уни безовта қилиб келган. Маълум бўлишича, у тадбиркор аёлнинг дўконига бир неча марта ўз инспекторларини юборган. Сўнг унинг ҳолидан “ташвишланаётганини”, хоҳласа, кечқурун бир пиёла чой баҳонасида гаплашиб олиши мумкинлигини ёзгани айтилади. Унинг гапидан қўрқиб қолган аёл ҳатто бир неча кунлаб дўконига бормай, уйда ўтирган.

Ҳолат юзасидан Янгиер шаҳар прокуратураси Маъмурий жавобгарлик тўғрисидаги кодекснинг 183-моддаси (майда безорилик) билан иш қўзғатган. Солиқ қўмитаси томонидан хизмат текшируви тайинланган ва А.Б. ишдан бўшатилган.

Абдураҳмон Ташанов юқоридаги ҳолат юзасидан прокуратура томонидан майда безориликни назарда тутувчи модда билан иш очилганига қуйидагича муносабат билдирган:

“Давлат Солиқ қўмитасининг Ички хавфсизлик бошқармаси иш материалларини қонуний чора кўриш учун прокуратурага ўтказди, прокурор майдагина безорилик билан иш очди. Аммо бу майда безорилик ва миллий зеҳният, ўзбекчилик туфайли бир оила бузилиши, етимлар статистикаси юксалиши мумкин эди. Бу ўринда SMS-хабарларни ошкор қилиш, оилани яна-да мураккаб аҳволга солишни истамайман, аммо нега прокуратура кўриниб турган мансабни суиистеъмол қилишни яширмоқда, шу савол теварагида гаплашамиз.

Тадбиркор ҳам ердан чиққан қўзиқорин эмас, солиқбошининг зирҳли амали бўлмаса, бундай шилқимларга қандай жавоб беришни ўзи билади. Бироқ бу ерда субъектив жиҳатдан давлат ҳокимиятининг кучи бор, эҳтимол шунинг учун ҳам прокуратуранинг тили қисиқдир. Аммо прокурорлар бир бечора бировга ола қараса, прокурорнинг шерга айланишини биласиз. Шу боисдан ҳам ҳозирда хотин-қизлар ҳуқуқи учун фаол курашаётган опа-сингилларимиз, ғурури баланд акаларимиз бундай боёнларнинг таъзирини (виртуал, албатта) бериб қўйишса, бошқаларига сабоқ бўлармиди, дейман-да”, дея ёзган ҳуқуқ фаоли.

Эслатиб ўтамиз, аввалроқ Мактабгача ва мактаб таълими вазирлиги масъул ходимининг аёлларга менежерлик сертификатини олиш ва мактаб директори сифатида ишга жойлашишда ёрдам бериш эвазига у билан жинсий алоқа қилишни таклиф қилганди.