Тошкентга учган самолётда “ҳунар кўрсатган” россиялик 7 суткага қамалди (видео)

“Куала-Лумпур – Тошкент” йўналишида учган самолётда маст ҳолда жанжал кўтарган Россия фуқароси 7 суткага маъмурий қамоққа олинди. QALAMPIR.UZ суд ҳужжати билан танишди.

Суд ҳужжатларига кўра, 1990 йилда туғилган В.К. жорий йилнинг 5 ноябрь куни HY-552 рейси билан Тошкентга учиб келаётганида тартибни бузган. У парвоз давомида бир неча бор спиртли ичимлик сўраган. Бироқ маст ҳолатда бўлгани сабабли борткузатувчи аёл унга ичимлик беришни рад этган.

Шундан сўнг, йўловчи борткузатувчини ҳақорат қилган, бошқа экипаж аъзолари ва йўловчиларнинг тинчлигини бузган.

Самолёт Тошкент халқаро аэропортига қўнгач, ички ишлар ходимлари ундан тинчланиб, самолётдан тушишни ҳамда тушунтириш бериш учун маъмурий бинога боришни талаб қилган. Бироқ россиялик уларнинг қонуний талабларига бўйсунмаган, ҳақоратли сўзлар ишлатишда давом этган. Шунингдек, қўл юкини самолёт трапидан ерга улоқтириб, тепган.

Судда В.К. ўз айбини тан олиб, қилган ишидан афсусдалигини айтган ва бундан буён бундай хатти-ҳаракатга йўл қўймаслигини билдирган.

Суд қарори билан у Маъмурий жавобгарлик тўғрисидаги кодекснинг 183-моддаси (майда безорилик) ҳамда 194-моддаси 1-қисми (ички ишлар органлари ходимларининг қонуний талабларини бажармаслик) бўйича айбдор деб топилган. Унга майда безорилик учун 7 сутка маъмурий қамоқ жазоси ҳамда ички ишлар ходимларининг талабларига бўйсунмагани учун 440 минг сўм жарима тайинланган.