Сув омборлари атрофида туризмни йўлга қўйган тадбиркорларга солиқ имтиёзлари берилади

Сув омборлари ва уларга туташ ҳудудларда туризм хизматларини ташкил этган тадбиркорларга 2029 йил 1 октябрга қадар солиқ ва божхона имтиёзлари берилади. Бу Президентнинг 2026 йил 27 октябрдаги ПҚ–387-сон қарорида белгиланган.

Қарорга кўра, ушбу ҳудудларда туризм хизматларини ташкил этган юридик шахслар учун ер ва мол-мулк солиғи ставкалари белгиланган ставкаларнинг 50 фоизи миқдорида қўлланади. Шу билан бирга, сувда фойдаланишга мўлжалланган GPS қурилмалари, қутқарув ва хавфсизлик анжомлари ҳамда замонавий санитария-гигиена шохобчаларини Ўзбекистонга олиб киришда божхона тўловларини 120 кунга кечиктириб ёки бўлиб-бўлиб тўлашга рухсат берилади.

Қарорда туризм объектларида хавфсизликни таъминлаш бўйича тадбиркорлар бажариши шарт бўлган талаблар ҳам белгиланган. Жумладан, объектлар ташриф буюрувчилар хавфсизлигини таъминлаш, уларнинг соғлиғини муҳофаза қилиш ва фавқулодда вазиятларнинг олдини олиш учун зарур хавфсизлик воситалари билан жиҳозланиши керак.

Фавқулодда вазиятларда тезкор қутқарув ишларини амалга ошириш учун қутқарув хизмати ташкил этилиши ёки профессионал қутқарув тузилмалари билан шартнома асосида навбатчилик хизмати йўлга қўйилиши лозим. Бундан ташқари, кичик ҳажмли кемалар ва улар турадиган иншоотлардан хавфсиз фойдаланиш бўйича қонунчилик талабларига риоя этилиши шарт.

Туризм объектлари сувни муҳофаза қилиш зоналари ва соҳилбўйи минтақаларига қўйилган талабларга ҳам амал қилиши керак. Оқова сувларнинг сув объектларига ташланишига йўл қўймаслик учун ички канализация тармоқлари ва локал оқова сувларни тозалаш иншоотлари ташкил этилиши белгиланган.

Шунингдек, туризм объектларида ҳосил бўладиган маиший чиқиндилар белгиланган тартибда утилизация қилиниши шарт.