Сурияда ўзбек жангчилари қўлга олинди

Сурия Хавфсизлик кучлари мамлакатнинг шимоли-ғарбида ўтказилган рейд давомида бир гуруҳ ўзбек жангчиларини қўлга олди. Бу ҳақда “Reuters” хабар берди.

Расмийлар ва маҳаллий аҳоли Идлиб шаҳрида ўқ узганликда айбланаётган ўзбек жангчини қўлга олишга уриниш ортидан кескинлик бошланганини маълум қилган. Шундан сўнг қуролланган ўзбек жангчилари унинг озод этилишини талаб қилиб, намойиш ўтказган. Можаро ҳукумат хавфсизлик идораси олдида норозилик намойишларига айланиб кетган.

Сурия Ички ишлар вазирлиги, маҳаллий аҳоли ва расмийлар хавфсизлик кучлари Идлиб вилоятининг қишлоқ ҳудудларидаги бир нечта жойларда, жумладан Кафрия ва ал-Фуа шаҳарларида рейд ўтказиб, намойишда қатнашган ўзбек жангчиларини нишонга олган. Ушбу ҳудудларга қўшимча ҳарбий кучлар ва техника юборилган, айрим жойларда эса вақти-вақти билан ўқ овозлари эшитилган.

Қанча ўзбек жангчи қўлга олингани ҳозирча аниқ эмас. Маълумотларга кўра, 2025 йилда Сурияда тахминан 1500 нафар ўзбек жангчи бўлган, уларнинг айримлари оилалари билан яшайди.

Мазкур ҳодиса сўнгги ойларда Идлиб ҳудудида Сурия ҳукумат кучлари ва хорижий жангчилар ўртасидаги иккинчи тўқнашув ҳисобланади. Мамлакатда бунга ўхшаш воқеа 2025 йилнинг октябрь ойида Туркия чегараси яқинида франциялик Омар Диаби (Омар Омсен номи билан танилган) бошчилигидаги лагерь атрофида ҳам кескинлик юзага келган эди.

Сурия ҳукумати хорижий жангчиларнинг мақомини расмийлаштиришга ҳаракат қилмоқда ва минглаб кишини янги Сурия армияси таркибига киритган. Баъзилари ҳатто юқори давлат лавозимларини эгаллаган. Масалан, иорданиялик жангчи президентни ҳимоя қилувчи Республика гвардиясига қўмондонлик қилмоқда, яна бир австралиялик эса янги ташкил этилган суверен фондга раҳбарлик қилмоқда.