Собиқликдан-содиқликкача: Трампнинг собиқ адвокати АҚШ Бош прокурори бўлди

АҚШ Сенати Дональд Трампнинг собиқ шахсий адвокати Тодд Бланшни мамлакат Бош прокурори лавозимига тасдиқлади. Унинг номзоди республикачилар орасидаги қаршиликларга қарамай маъқулланди. Бу ҳақда “The Guardian” хабар берди.

Маълум қилинишича, овоз беришда Луизиана штатидан сенатор Билл Кэссиди ҳал қилувчи овозни берган. Икки республикачи сенатор – Мейн штатидан Сьюзан Коллинз ва Аляскадан Лиза Мурковски Бланшга қарши овоз берган. Сенатдаги барча демократлар ҳам унинг номзодини рад этган.

“Жаноб Бланш мукаммал эмас ва унинг ўзи ҳам буни айтади. Аммо танлов мукаммаллик ва Бланш ўртасида эмас. Танлов Бланш ва Трамп президентлиги даврида Адлия вазирлигини самарали бошқара олмаслиги, ҳаттоки Бланшдан ҳам ёмонроқ бўлиши мумкин бўлган бошқа бош прокурор вазифасини бажарувчи ўртасида”, деган Кэссиди.

Бланшнинг номзоди бир неча ҳафта давомида Сенатда ноаниқ ҳолатда қолган. Бунга Адлия вазирлигининг 1,8 миллиард долларлик “сиёсий қуролланишга қарши жамғарма” ташкил этиш ҳамда президент, унинг ўғиллари ва бизнесига солиқ масалаларида иммунитет бериш ҳақидаги келишуви сабаб бўлган.

Мурковский ушбу жамғармага қарши чиқиб, овоз беришдан аввал хавотирларини билдирган.

“Мен Адлия вазирлигининг қарийб 2 миллиард долларлик яширин жамғармаси 2021 йил 6 январда Капитолийга бостириб кирган Трамп тарафдорларини мукофотлаган бўлиши мумкинлигини яхши тушунаман. Бу жамғарма ҳозирча Сенатнинг таъсири сабабли кун тартибидан чиқарилган. Овоз берилгач эса бу имконият йўқолади ва кейин нима бўлишини ҳеч ким билмайди.

Шунга қарамай, Техас штатидан сенатор Жон Корнин ва Шимолий Каролинадан сенатор Том Тиллис Бланшдан жамғарма ташкил этилмаслигини ёзма равишда тасдиқлашни ва АҚШ Ички даромадлар хизмати билан келишув доирасини аниқлаштиришни талаб қилган. Уларнинг қўллаб-қувватлаши Бланш номзодининг Сенат суд-ҳуқуқ қўмитасидан ўтишига ёрдам берган.

Бланш Адлия вазирлигининг марҳум молиячи Жеффри Эпштейнга оид ҳужжатларни эълон қилиш жараёни учун ҳам танқид қилинди. Хусусан, айрим маълумотлар асоссиз равишда яширилгани, аксинча, жабрланувчиларнинг махфий сақланиши керак бўлган исмлари очиқ қолган.

Бланш 2023 йилда Трампни ҳимоя қилиш учун даромадли адвокатлик фаолиятини тарк этган. Шундан буён у Трампнинг федерал ҳукумат устидан назоратини кучайтиришга қаратилган сиёсатининг муҳим фигураси бўлиб келмоқда.

У бош прокурор ўринбосари ва бош прокурор вазифасини бажарувчи сифатида фаолият юритган даврда собиқ ФҚБ директори Жеймс Коми, Нью-Йорк бош прокурори Летиция Жеймс ҳамда “Southern Poverty Law Center” ташкилотига қарши ишлар очилган.

Бундан ташқари, Адлия вазирлиги Мичиган штатидан сенатор Элисса Слоткин ва Аризона штатидан сенатор Марк Келлига қарши жиноий иш очишга уринган. Бланш даврида вазирликнинг сиёсийлашуви юзасидан ҳам танқидлар кучайган.

“Мен жаноб Бланшни қобилиятли ҳуқуқшунос деб ҳисобласам-да, Адлия вазирлиги тобора сиёсийлашиб бормоқда. Жаноб Бланш вазирликнинг мустақиллигини янада заифлаштирган бир қатор ҳаракатларни амалга оширди. Мен унинг тасдиқланишига қарши овоз беришимга айнан шу сабаб бўлмоқда”, деган сенатор Сьюзан Коллинз.

Бланш эса аввалроқ бош прокурор лавозимини эгаллаш борасидаги муносабати ҳақида гапириб, Трампга содиқлигини билдирган.

“Мен бу ишни сўрамаганман. Мен Президент Трамп билан ишлашни яхши кўраман, бу ҳаётимдаги энг катта шараф. Агар у бошқа бировни номзод қилиб кўрсатса ва мендан бошқа иш билан шуғулланишимни сўраса, мен: “Катта раҳмат. Мен сизни яхши кўраман, жаноб”, дейман. Менда бундан бошқа мақсад ёки интилиш йўқ”, деган Бланш.

Эслатиб ўтамиз, аввалроқ АҚШ Президенти Дональд Трамп тавсия қилган Дарлин Грэм Нордон марҳум акаси Линдси Грэмнинг ўрнига АҚШ Сенатига тайинланган эди.