Собиқ футболчининг қамоқда ёзган хати сотувга қўйилди

Москва шаҳрининг “Торпедо” жамоасининг собиқ футболчиси ва совет футболининг афсонаси Эдуард Стрелсов томонидан қамоқхонадан уйига ёзилган хати 2 миллион рубль (тахминан 24 800 АҚШ доллари)га сотувга қўйилди. Бу ҳақда “Пресс” нашри хабар берди.

Хатда машҳур футболчи панжара ортидаги ҳаёти, футболга бўлган муносабати, ёмон одатлари ҳамда “Спартак”га қарши дербини радиода қандай кузатиб боргани ҳақида сўз юритган.

“Соғлиғим яхши. Машғулот ўтказяпман, бир томонлама ўйинлар ўйнаяпмиз ва дарвозага зарбалар беряпман. Тўп учун яна бир бор раҳмат. Тез орада чекишни ташлайман. Бу жуда соғлиққа зарарли эканини тушунаман. Менга хайрия керак эмас. Ҳали хайрия қабул қилишим керак бўлган даражага етмаганман”,  деб ёзган хатда Стрелсов.

Маълумот учун, Эдуард Стрелсов 1958 йил июлидан 1963 йил февралигача зўрлаш айблови билан қамоқ жазосини ўтаган. Футболчи ўзини айбсиз деб ҳисоблаган.