Словенияда Исроил элчихонаси очилди: норози халқ бош кўтарди (видео)

Кеча, 9 сентябрь куни Словения пойтахти Люблянада Исроилнинг мамлакатдаги илк элчихонаси очилди. Бунга қарши минглаб одамлар норозилик намойишига чиқди. Бу ҳақда “Al Jazeera” хабар берди.

Қайд этилишича, намойишчилар элчихона очилиши ўтказилган меҳмонхона ёнидан юриб ўтиб, “Биз тинчлик ва Фаластин учун биргамиз” ҳамда “Геноцид ўзини ҳимоя қилиш эмас” каби ёзувлар туширилган баннерларни кўтарган. Словениялик 48 ёшли санъатшунос Урска Брезник Янса ҳукуматини “ҳамкорлик” ҳукумати деб атаган. Яна бир намойишчи Мелина Сахерник эса бу ҳолат Словения учун жуда ёмон кўринишини айтган.

“Delo” газетаси июнь ойида ўтказган сўров натижаларига кўра, словенияликларнинг 56 фоизи Исроил билан яқинроқ алоқалар ўрнатишга қарши бўлган, 14 фоизи эса бундай муносабатларни қўллаб-қувватлаган.

Словениялик сиёсий таҳлилчи Андраз Зорконинг айтишича, ҳукуматнинг Исроилга нисбатан сиёсатидаги ўзгариш мамлакатдаги жамоатчилик кайфиятига мос келмайди. Унинг фикрича, аҳолининг аксарияти Исроилга қарши ёки бетараф позицияда.

Шунингдек, собиқ бош вазир Роберт Голоб бошчилигидаги либерал “Озодлик ҳаракати” партияси “Сўл” партияси билан биргаликда Янес Янсага импичмент эълон қилиш таклифини парламентга киритди. Улар бош вазирнинг ташқи сиёсати фақат Исроил манфаатларига хизмат қилаётганини таъкидлаган.

Партия, шунингдек, Ташқи ишлар вазири Тоне Кайзерни лавозимидан четлатишни ҳам талаб қилган. Улар элчихона очилишини Исроилнинг март ойидаги сайловлар вақтида Янсани қўллаб-қувватлагани эвазига “яхшиликни қайтариш” сифатида баҳолаган.

Голоб ҳукумати даврида Словения Фаластин давлатини тан олган, Исроилга қурол-яроғ экспортига эмбарго жорий қилган, босиб олинган Ғарбий Соҳилдаги ноқонуний Исроил аҳоли пунктларидан импортни тақиқлаган ва Исроилнинг Бош вазири Бинямин Нетаняху каби юқори мартабали амалдорларининг мамлакатга киришини чеклаган.

Элчихона очилиш маросимида Словения Ташқи ишлар вазири Тоне Кайзер бу воқеа “янада катта мулоқот, кучлироқ ҳамкорлик ва, энг муҳими, халқлар манфаатлари йўлида аниқроқ натижалар” даврининг бошланиши бўлиши кераклигини айтган.

Маросимда иштирок этиш учун Словенияга борган Исроил Ташқи ишлар вазири Гидеон Саар эса бу кунни “тарихий кун” деб атаган. У Словения ҳукумати ва Янсага Исроилга нисбатан дўстона муносабати учун миннатдорлик билдирган.

Элчихона очилиши Буюк Британия босиб олинган Ғарбий Соҳилдаги ноқонуний Исроил аҳоли пунктлари билан савдони тақиқлаганидан бир кун ўтиб амалга оширилган. Франция ва Канада ҳам шунга ўхшаш чоралар кўришини маълум қилган.

Эслатиб ўтамиз, аввалроқ Исроил Буюк Британиянинг Шарқий Қуддусдаги консуллигини 30 кун ичида ёпишни ва ундаги дипломатларнинг аккредитациясини бекор қилишни буюрган эди.