Словения Исроилга қурол эмбаргосини жорий қилди

Словения Исроил билан қурол савдосини бутунлай тақиқлаган биринчи Европа Иттифоқи давлатига айланди. Бу ҳақда мамлакат ҳукумати хабар берди.

Словения расмийлари бу қарорни Ғазо сектори аҳолиси мунтазам равишда инсонпарварлик ёрдамидан фойдалана олмаслиги ва Европа Иттифоқи мамлакатлари можаро бўйича ягона позицияга эга эмаслиги билан изоҳлади. Словения ҳукумати 1 август куни аниқлик киритишича, минтақада ҳарбий ҳаракатлар бошланган 2023 йилнинг октябрь ойидан бери Исроилга қурол етказиб бериш учун рухсатнома бермаган.

Исроилга қурол экспорти, импорти ва транзитини тақиқлашни ўз ичига олган эмбарго, ҳукумат йиғилишидан кейин Бош вазир Роберт Голоб томонидан эълон қилинди.

“Словения Исроилга ва Исроилдан қурол олиб кириш, экспорт қилиш ва транзитини тақиқлаган биринчи Европа давлатига айланди”, дейилади баёнотда.

Ҳужжатда таъкидланишича, бу қарор “инсонпарварлик ёрдамини тизимли равишда рад этиш” ва Ғазо тинч аҳолисининг оммавий қурбонлари фонида қабул қилинган. Словения ҳукумати Европа Иттифоқи “ички келишмовчиликлар туфайли аниқ чоралар кўра олмаслигини” таъкидлади ва шунинг учун Любляна мустақил ҳаракат қилаётганини билдирди.

Исроил ҳукумати вакилининг маҳаллий “Ynet” нашрига айтишича, Словения ҳукуматининг қарори оммавий ахборот воситалари учун қабул қилинган ва “умуман аҳамияти йўқ”, чунки давлатлар барибир бир-биридан ҳарбий техника сотиб олмайди.

Бу Словения ҳукуматининг Тель-Авивга нисбатан биринчи қаттиқ қарори эмас: июль ойи бошида Любляна икки ўта ўнгчи исроиллик вазирни зўравонлик ва инсон ҳуқуқларини қўпол равишда бузганликда айблаб, уларга киришни тақиқлади. Иккаласи ҳам персона нон грата деб эълон қилинди.

Словенияда йирик қурол ишлаб чиқарувчилар йўқ. Мамлакат армияси асосан Ғарб русумидаги ҳарбий техника билан жиҳозланган. Бундан ташқари, 2022 йилнинг сентябрида Словения Исроилдан 50 та Spike LR2 танкга қарши ракета тизимини сотиб олди. ОАВ маълумотларига кўра, у 2009 йилдан бери худди шу қуролнинг бошқа модификацияларидан фойдаланиб келади.

Эслатиб ўтамиз, 2024 йилнинг июнь ойида Словения парламенти Фаластинни мустақил давлат сифатида тан олганди.