Словения Нетаньяхунинг мамлакатга киришини тақиқлади

Словения ҳукумати Исроил Бош вазири Биньямин Нетаньяхунинг мамлакатга киришини тақиқлади. Бу ҳақда мамлакатнинг 24UR телеканали хабар берди.

Словения Ташқи ишлар вазирлиги матбуот котиби Нева Грашичнинг тушунтиришича, Нетаньяхуга нисбатан бундай қарор унинг “уруш жиноятлари ва инсониятга қарши жиноятларни содир этишда” айбланиб, унга қарши суд жараёни олиб борилаётгани билан изоҳланади.

Тақиқ июль ойида Исроилнинг Миллий хавфсизлик вазири Итамар Бен-Гвир ва Молия ҳамда мудофаа вазири Бецалель Смотричга қарши қўлланган чоралардан кейин қабул қилинган. Ўшанда исроиллик вазирлар “персона нон грата” деб эълон қилинган эди.

“Бу вазирлар ўзларининг геноцид ҳақидаги баёнотлари билан фаластинликларга қарши ўта зўравонликка ва инсон ҳуқуқларининг қўпол равишда бузилишига ундамоқда”, дейилади хабарда.

Исроил Бош вазири илгари Фаластин давлатининг мавжудлигини Исроил учун “таҳдид” деб атаган эди.

Қайд этиш жоиз, кеча, 25 сентябрь куни тонгда Нетаньяху Тель-Авивдан Нью-Йоркка БМТ Бош Ассамблеясида қатнашиш учун жўнаб кетди ва одатдаги АҚШга учиш йўналишини ўзгартирди. Ичида Исроил Бош вазири бўлган самолёт уни Халқаро жиноий суд (ХЖС) ордери асосида қўлга олиш эҳтимоли бўлган давлатларнинг ҳаво ҳудудидан ўтмади.

БМТ Бош Ассамблеясидаги чиқишида Нетаньяху Фаластин давлатини тан олган мамлакатларни танқид қилишни режалаштирмоқда.

Эслатиб ўтамиз, аввалроқ АҚШ ҳукумати ХЖСни тўлиқ нишонга олиш масаласини кўриб чиқаётгани ҳақида хабар берилганди. Давлат котиби Марко Рубио уни “миллий хавфсизликка таҳдид” ва “АҚШ ҳамда унинг иттифоқчиси бўлган Исроилга қарши юридик уруш қуроли” деб атаган.