“Сити” “Реал” президентлигига номзодни судга бермоқчи

“Манчестер Сити” клуби норвегиялик ҳужумчи Эрлинг Ҳоланднинг сурати ва номидан “Реал Мадрид” президентлигига номзод Энрике Рикельменинг сайловолди кампаниясида фойдаланилгани учун судга мурожаат қилмоқчи. Бу ҳақда журналист Фабрицио Романо маълум қилди. 

Романонинг ёзишича, Рикельме сайловолди дастурида Ҳоланд номи туширилган футболкада чиқиш қилиб, сайловда ғалаба қозонса, норвегиялик футболчи билан шартнома имзолашга ваъда берган. Бунга жавобан “Манчестер Сити” мазкур даъвони рад этган.

“Бунинг содир бўлиш эҳтимоли йўқ. Шартномада бундай трансферга рухсат берувчи банд мавжуд эмас. Шунингдек, футболчимиз имижидан мазкур контекстда фойдаланилгани юзасидан судга мурожаат қилиш масаласини кўриб чиқмоқдамиз”, дейилади клуб баёнотида.

Сайловолди чиқиши давомида Рикельме Жозе Моуриньо унинг раҳбарлигида “Реал Мадрид” бош мураббийи бўлмаслигини ҳам таъкидлади.

“У бизнинг лойиҳамизга мос келмайди. Мен бошқа мураббийни назарда тутяпман”, дейди Рикельме.

25 ёшли Эрлинг Ҳоланд 2022 йилдан буён “Манчестер Сити” сафида тўп суриб келмоқда. У жамоа билан Чемпионлар лигаси, икки марта Англия чемпионлиги, икки марта Англия Кубоги, шунингдек, Англия Лига кубоги соҳиби бўлган.

Махлумот учун, “Реал Мадрид” президентлигига сайлов жорий йилнинг 7 июнь куни бўлиб ўтади. Амалдаги президент Флорентино Перес ҳам мазкур лавозим учун кураш олиб бормоқда.

Эслатиб ўтамиз, аввалроқ Фабрицио Романо португалиялик мутахассис Жозе Моуриньо Испания клуби билан келишувга эришгани ва келаси мавсумдан жамоани бошқариши мумкинлиги ҳақида хабар берган эди.