“Сити” АПЛ билан махфий музокара ўтказди – ОАВ

“Манчестер Сити” Англия Премьер-лигаси билан молиявий қоидалар бузилишига оид айбловлар бўйича жазони енгиллатишга уринган. Бу ҳақда “Bloomberg” нашри хабар берди.

Манбага кўра, музокаралар “Манчестер Сити” деярли барча айбловлар бўйича айбдор деб топилишидан олдин ўтказилган. Клуб ўз айбсизлигини қатъий таъкидлаб келгани сабабли, томонлар ўртасидаги музокаралар тез орада боши берк кўчага кириб қолган.

Таъкидланишича, томонлар муҳокамалар давомида клуб катта миқдорда молиявий компенсация тўлаш эвазига Премьер-лигадан четлатилиш ёки чемпионлик унвонларидан маҳрум этилиш каби оғир жазолардан қочиши мумкин бўлган вариант кўриб чиқилган. Айрим мутахассислар бундай жазолар қўлланиши эҳтимолини юқори баҳоламоқда.

Шу билан бирга, ишнинг кўламини ҳисобга олганда, эҳтимолий келишув барча айбловларни бекор қилишдан кўра, жазо чораларини юмшатишга хизмат қилиши мумкин эди. Клуб ва Премьер-лига вакиллари бу масала юзасидан изоҳ беришдан бош тортган.

Ҳозирда “Манчестер Сити” комиссия қарори устидан апелляция берган. Клуб қарорда ҳуқуқий, принципиал ва фактик хатолар борлигини таъкидламоқда. Премьер-лига қоидаларига мувофиқ, апелляция бўйича қарор февраль ойи бошига қадар эълон қилиниши керак.

Эслатиб ўтамиз, аввалроқ Премьер-лигасининг энг кучли бешта клуби “Манчестер Сити”ни мусобақадан четлатиш ва клубга трансфер тақиқини жорий этиш истагини билдирганди.