Сибирни “ўзбеклар юрти” деб атаган депутат маошидан айрилди

Аввалроқ, Россиянинг Ханти-Мансийск округи думасининг Коммунистик партиядан сайланган депутати Холид Таги-Заде Сибир ўлкаси ўзбекларнинг тарихий маскани эканини айтганди. У шу гапи учун маошидан маҳрум қилинди. Бу ҳақда “Коммерсанть” хабар берди.

Нашрга кўра, округ думаси раиси Борис Хохряков (“Ягона Россия” партиясидан) бу фикрни “йўл қўйиб бўлмайдиган провокация” деб атаган ва ушбу ҳолатда ёмон ният бўлмаганига ишора қилиш қабул қилинмаслигини айтган.

Думанинг ижтимоий ривожланиш бўйича қўмитаси раиси Василий Филиппенконинг (“Ягона Россия” партиясидан) айтишича, Таги-Задени маошдан маҳрум қилиш қарори парламент ва қўмита мажлисларини мунтазам қолдиргани билан изоҳланган. Унга кўра, депутатдан ҳеч қандай ташаббус ёки маълумот келмаган, саволлар фақат мажлислар доирасида берилган, холос. Бу эса “у қолган вақтини бошқа ишлар билан ўтказаётганидан далолат беради”.

Таги-Заде эса сўзга чиқиб, вазиятни янада оғирлаштирмасликни сўраган.

“Маошдан маҳрум қилиш, албатта, аҳволимни ёмонлаштиради. Мени оилам бор, болаларим бор”, дейди у.

Шунингдек, Таги-Заде мажлисларда иштирок этмаганини таътил билан изоҳлаган.

“Чақирувга розилик билдириш ёки билдирмаслик – бу меҳнат кодексига кўра ходимнинг ҳуқуқи”, дейди депутат.

Нутқининг сўнгида у “ўзбекларнинг тарихий ватани” ҳақидаги фикрини охиригача баён қилишга улгурмаганини билдирган. Бунга сабаб спикер Борис Хохряковнинг уни тўхтатгани бўлган.

“Менинг фикрим шундан иборат эдики, бу ерга ҳамма ҳам “бюджетга осилиб яшаш учун” келмайди. Балки, кимдир яхши ният билан келади, умумий маданият, тарих борлигини ҳис этади, Россиянинг бир қисмига айланишни истайди”, дейди Коммунистик партия фракцияси аъзоси.

Таги-Задени маошидан маҳрум қилиш қарорини 32 депутат қўллаб-қувватлаган, 5 нафари овоз бермаган, 1 нафари қарши чиққан.

Эслатиб ўтамиз, Холид Таги-Заде май ойидаги парламент мажлисида Юграда мигрантлар орасида туғилиш кўрсаткичи ортгани муҳокама қилинаётганида Ханти-Мансийск ва Тюмень вилоятининг бир қисмини “тарихан Сибир хонлиги” деб атаган эди. У минтақада Кўчум Хон ҳукмронлик қилганини, у Бухоро хонлигидан чиққан Шайбонийлар сулоласининг вакили – ўзбек сулоласидан эканини айтган.

Унинг бу баёноти Коммунистик партия, Либерал-демократик партия ва “Ягона Россия” партияларининг Давлат думасидаги депутатлари эътиборини тортган ва улар Федерал хавфсизлик хизмати ҳамда Бош прокуратурани Таги-Задени текширишга чақирган. Шундан сўнг, ХМАО думаси уни ижтимоий ривожланиш бўйича қўмита раиси ўринбосари лавозимидан ҳам четлатган. Спикер Хохряков эса, агар ҳуқуқий асос топилса, унинг депутатлик ваколатидан бутунлай маҳрум қилиш масаласи ҳам кўриб чиқилишини айтган.