Швецияда ўсмир қизлар граната билан ҳужум уюштирди

Швецияда 14, 16 ва 17 ёшли қизлар томонидан иккита граната ҳужуми амалга оширилди. Улар бу ҳаракатларни “Супер Марио” тахаллусидан фойдаланган шахс кўрсатмаларига биноан қилган. Бу ҳақда “Watchers” хабар берди.

Қайд этилишича, биринчи ҳужум 2025 йил 5 сентябрь куни Мёльндаль комуннасидаги кўп қаватли уй киришида амалга оширилган, аммо граната портламаган. Унда 14 ва 16 ёшли қизлар иштирок этган. Бино хавфсизлик нуқтаи назаридан эвакуация қилинган.

Кейинги куни, 6 октябрда уч қиз Нёдинге шаҳридаги кўп қаватли уйга икки граната ташлаган. Бир граната портлаган, иккинчиси бино ёнидан топилган. Ҳужум пайтида воқеа видеога олиниб, уларни бошқариб турган “Супер Марио” лақабли одамга жонли эфирда узатилган. “Супер Марио” уларга СМС орқали “Иккала бомба ҳам ташландими?” деб сўраган ва кейин “Мукаммал қизлар” деб табриклаган.

Уч қиз ушбу ҳужумлар учун жами 45 000 швед кронаси олган. 14 ёшли қиз “Супер Марио” билан алоқаси борлигини ва ҳужумларни тўдалар уруши доирасида “қасос” сифатида қилганини тан олган. Гранаталардан фойдаланишни интернет видеоларидан ўрганганини айтган.

Учала қиз ҳам чуқур пушаймонлик билдирган. 17 ёшли қиз ҳужумдан кейин бир неча кун йиғлаганини айтган, 16 ёшли қиз эса “Супер Марио” таҳдид қилганини даъво қилган.

16 ва 17 ёшли қизлар жамоат хавфсизлигига таҳдид қилиш, портловчи моддалар билан боғлиқ қонунларни бузиш айбловлари билан судга тортилган. 14 ёшли қиз эса жиноий жавобгарликка тортилмаган, унга қарши фақат далилларни тўплаш бўйича махсус иш очилган.

Эслатиб ўтамиз, аввалроқ АҚШда Янги йил кечасида теракт уюштиришни режалаштирганлар ҳибсга олинганди.