Qonli hujum: 16 yoshli o‘smir maktabda 4 kishini o‘ldirdi

AQSHning Oregon shtatidagi Bend shahrida joylashgan boshlang‘ich maktabda 16 yoshli o‘smirning qurolli hujumi oqibatida uch nafar bola va bir o‘qituvchi halok bo‘ldi. Hujumchi esa voqea joyida bo‘lgan mahalliy aholi vakili tomonidan otib o‘ldirildi. Bu haqda “Associated Press” xabar berdi.

Ma’lum qilinishicha, voqea kecha, 15 oktyabr kuni Silver Rail boshlang‘ich maktabida sodir bo‘lgan. Hujumchi maktab hududiga qulflangan eshiklarga o‘q uzib, ichkariga kirgan. Halok bo‘lgan bolalarning yoshi 5, 8 va 11 da bo‘lgan. Jarohatlangan 7 yoshli o‘quvchi va 54 yoshli o‘qituvchi og‘ir ahvolda shifoxonaga yotqizilgan.

Bend shahri politsiyasi boshlig‘i Mayk Kransning aytishicha, otishma uyushtirgan o‘smir otishma haqida birinchi xabar kelib tushganidan bir necha daqiqa o‘tib, maktab ichida o‘lik holda topilgan. Politsiya vakili Sheyla Millerning ma’lum qilishicha, maktab ichidan ham favqulodda xizmatlarga qo‘ng‘iroqlar bo‘lgan va huquq-tartibot idoralari xodimlari bir necha daqiqa ichida voqea joyiga yetib kelgan.

Politsiya otishma uyushtirgan o‘smirning maktabdagi biror kishini tanish-tanimagani yoki ushbu ta’lim muassasasida o‘qigan-o‘qimaganini hozircha aniqlamagan. Shuningdek, hujumchi Bend shahri aholisi ekani ma’lum qilingan.

Dastlabki ma’lumotlarga ko‘ra, favqulodda xizmatlarga mahalliy vaqt bilan soat 13:00 ga qadar maktab tashqarisida turgan avtomobildagi shaxs qo‘ng‘iroq qilgan. U uzun stvolli qurol bilan qurollangan kimdir unga o‘q uzganini bildirgan. Shundan keyin maktabga hujum qilingani haqida boshqa qo‘ng‘iroqlar ham kelib tushgan.

Qayd etilishicha, hujumchi onasi tomonidan sotib olingan nasosli miltiqdan foydalangan. Bu haqda tergovdan xabardor, biroq ish tafsilotlarini oshkor qilish vakolatiga ega bo‘lmagani uchun ismini aytmaslik sharti bilan gapirgan huquq-tartibot idorasi xodimi ma’lum qilgan.

Otishmadan so‘ng bolalar avtobuslarda yaqin atrofdagi cherkovga olib borilgan. U yerda ota-onalar farzandlarini quchoqlab, kutib olgan. Ayrim bolalar o‘zlari bilan yumshoq o‘yinchoqlari va boshqa shaxsiy buyumlarini ham olib kelgan.

Oregon gubernatori Tina Kotek hujumchini to‘xtatish uchun aralashgan mahalliy aholi vakiliga minnatdorlik bildirgan. U halok bo‘lgan va jarohatlanganlar hamda ularning oilalari uchun qayg‘urayotganini aytgan.

Eslatib o‘tamiz, avvalroq Filippin janubidagi maktabda otishma yuz bergan edi. Oqibatda olti kishi halok bo‘lib, yana 17 kishi jarohat olgan. Hujumda gumon qilinayotgan shaxs ham halok bo‘lgan.