Сербияда мухолифат, Президент тарафдорлари ва полиция тўқнашди

north_east

“Мен диктатор эмасман”. Вучич энди сайловда қатнашмаслигини айтди

Сербиянинг бир қанча шаҳарларида мухолифат намойишчилари, Президент Александр Вучич тарафдорлари ва полиция ўртасида оммавий тўқнашувлар содир бўлди. Бу ҳақда BBC хабар берди.

Кеча, 13 август куни пойтахт Белградда, Сербия шимолидаги Нови Садда, жанубдаги Нисда, мамлакат марказидаги Крагужеваcда ва бошқа бир қанча шаҳарларда Президент Александр Вучичнинг мухолифлари ва унинг Сербия прогрессив партияси аъзолари ва полицияси ўртасида тўқнашувлар бўлиб ўтди.

Президент партиясининг маҳаллий идораларига тўпланган томонлар бир-бирига қарата пиротехника, петарда, тош ва турли буюмлар отган, муштлашган, полиция уларни ажратишга ҳаракат қилган.

Президент Вучич кеча кечқурун Нови Садда унинг 64 нафар тарафдори яраланганини айтди ва “бандитлар ва безорилар”га раҳм-шафқат кўрсатилмаслигига ваъда берди. Вучичнинг шахсан ўзи Белграддаги штаб-квартирасида йиғилган партиядошлари олдига кўчага чиқди.

Сербия полицияси раҳбари Драган Василевич шимолий Врбас шаҳридаги тўқнашувларда 16 нафар полициячи ва 50 нафар намойишчи яраланганини маълум қилди.

Талабалар ташкилотлари бошчилигидаги Сербия мухолифати тўққиз ойдан бери норозилик намойишларини ўтказмоқда. Улар ўтган йили 1 ноябрь куни Нови Сад вокзалида бетон соябон қулаши оқибатида 16 киши ҳалок бўлганидан кейин бошланган. Намойишчилар фожиа учун айбдорларни жазолаш, коррупцияга қарши курашни кучайтириш ва муддатидан олдин сайловлар ўтказишни талаб қилмоқда.

Январь ойида Сербия бош вазири ва Нови Саднинг собиқ мэри Милош Вучевич норозилик намойишлари туфайли истеъфога чиқди. Мамлакат парламенти бу қарорни март ойида тасдиқлади.

Ҳукуматнинг янги раҳбари тиббиёт профессори Джуро Макут бўлиб, унинг номзоди Вучич томонидан таклиф қилинган.