Саудиянинг 29 ёшли шаҳзодаси Лондондаги ҳашаматли меҳмонхонадан ўлик ҳолда топилди

Саудия Арабистони қироллик оиласи аъзоси Абдуллоҳ бин Фаҳд бин Абдуллоҳ бин Абдулазиз бин Жаллавий Ол Сауд Лондондаги ҳашаматли меҳмонхонада ўлик ҳолда топилди. Бу ҳақда “Evening Standard” хабар берди.

Маълум қилинишича, 29 ёшли шаҳзода 2025 йил 19 ноябрь куни Ғарбий Лондоннинг Кенсингтон туманидаги Marriott меҳмонхонасига бир ҳафтага жойлашган. У 2025 йил 25 ноябрь куни меҳмонхонанинг ювиниш хонасидан жонсиз ҳолда топилган. Қайд этилишича, бу ҳақидаги маълумотлар қарийб саккиз ой давомида сир тутиб келинган.

Энди эса Лондон Коронер судида ўтказилган эшитувда унинг ўлимига оид хулосалар эълон қилинди.

Судда эълон қилинган токсикологик экспертиза натижаларига кўра, марҳумнинг қонида 100 миллилитр қон учун 222 миллиграмм алкогол аниқланган. Бу Буюк Британияда автомобиль бошқариш учун рухсат этилган меъёрдан қарийб уч баравар юқори бўлиб, бундай миқдор кома ҳолатини ҳам келтириб чиқариши мумкин. Шунингдек, Коронер суди марҳум узоқ вақт давомида алкогол ва Xanax препаратига қарамлик билан курашганини маълум қилган.

Бундан ташқари, шаҳзоданинг организмида ўлимга олиб келиши мумкин бўлган миқдорда гамма-гидроксибутират, яъни кенг тарқалган “клуб наркотиги”, шунингдек каннабис, алпразолам ҳамда бошқа безовталикни камайтирувчи дори воситалари излари аниқланган.

Суд материалларига кўра, шаҳзода вафотидан бир кун аввал меҳмонхона кузатув камераларида унинг ташқарига сигарет чекиш учун чиқаётгани кўринган. Орадан кўп ўтмай, хонани тозалаш учун кирган ходим бешинчи қаватдаги қулфланган хонанинг ювиниш хонасида уни кийимлари билан ерда ётган ҳолатда топган.

Воқеа жойига меҳмонхона хавфсизлик хизмати ва тез ёрдам хизмати чақирилган. Шифокорлар унинг ҳаётини сақлаб қолишга ҳаракат қилган, бироқ фойдаси бўлмаган ва шаҳзода воқеа жойида вафот этгани эълон қилинган.

Аниқланишича, у вафотидан уч ой аввал Лондон жануби-ғарбидаги Роуҳэмптон ҳудудида жойлашган дунёга машҳур Priory Clinic реабилитация марказида даволанган. Шаҳзода у ерда алкогол, бензодиазепинлар ва прегабалин препаратига қарамликдан халос бўлиш учун детоксикация муолажаларини олган.

Клиника психиатри Виктория Чаморронинг судга тақдим этилган баёнотида шаҳзода даволаниш жараёнида шифокорлар тавсияларига яхши амал қилгани, бошқа беморлар билан самимий муносабат ўрнатгани ва даволанишни муваффақиятли якунлагани қайд этилган. Шифокорлар унинг клиникага қабул қилинганида тушкунлик ва хавотир аломатлари кузатилганини билдирган. Бироқ даволаниш якунида унда ўз жонига қасд қилиш хавфи йўқ, деган хулосага келинган.

Priory клиникасидан чиққач, шаҳзода Мерсисайд графлигидаги Rainford Hall хусусий клиникасида даволанишни давом эттирган. Ушбу муассасада унга юқори нафас йўллари инфекцияси ташхиси ҳам қўйилган. У соғайгач, 2025 йил 14 октябрь куни клиникани тарк этган.

Суд-тиббий экспертизаси шаҳзодада ҳеч қандай ўткир ёки сурункали касаллик бўлмаганини кўрсатган. Хулосага кўра, унинг ўлимига наркотик моддалар ва алкоголнинг биргаликдаги таъсири оқибатида юзага келган юрак тўхташи сабаб бўлган.

Терговчи ёрдамчиси Жан Харкин марҳумнинг ўз жонига қасд қилганига оид ҳеч қандай далил топилмаганини билдирган. Унинг қайд этишича, Priory ва Rainford Hall клиникаларининг ҳисоботларида ҳам шаҳзоданинг суицид хавфи йўқлиги кўрсатилган, у ҳеч кимга бундай нияти борлигини айтмаган ва меҳмонхона хонасидан ҳам хайрлашув хати топилмаган.

Шунингдек, тергов давомида учинчи шахсларнинг воқеага алоқадорлигини тасдиқловчи далиллар аниқланмаган. Кузатув камералари ёзувларида ҳам шаҳзоданинг ўлимидан олдинги оқшом ёлғиз бўлгани қайд этилган.

Эслатиб ўтамиз, аввалроқ америкалик молиячи ва жинсий жиноятларда айбланган Жеффри Эпштейн учун ёш аёлларни топиб берганликда гумон қилинган моделлар агенти Даниел Сиад Франциядаги уйида ўлик ҳолда топилган эди.