Saudiyaning 29 yoshli shahzodasi Londondagi hashamatli mehmonxonadan o‘lik holda topildi

Saudiya Arabistoni qirollik oilasi a’zosi Abdulloh bin Fahd bin Abdulloh bin Abdulaziz bin Jallaviy Ol Saud Londondagi hashamatli mehmonxonada o‘lik holda topildi. Bu haqda “Evening Standard” xabar berdi.

Ma’lum qilinishicha, 29 yoshli shahzoda 2025 yil 19 noyabr kuni G‘arbiy Londonning Kensington tumanidagi Marriott mehmonxonasiga bir haftaga joylashgan. U 2025 yil 25 noyabr kuni mehmonxonaning yuvinish xonasidan jonsiz holda topilgan. Qayd etilishicha, bu haqidagi ma’lumotlar qariyb sakkiz oy davomida sir tutib kelingan.

Endi esa London Koroner sudida o‘tkazilgan eshituvda uning o‘limiga oid xulosalar e’lon qilindi.

Sudda e’lon qilingan toksikologik ekspertiza natijalariga ko‘ra, marhumning qonida 100 millilitr qon uchun 222 milligramm alkogol aniqlangan. Bu Buyuk Britaniyada avtomobil boshqarish uchun ruxsat etilgan me’yordan qariyb uch baravar yuqori bo‘lib, bunday miqdor koma holatini ham keltirib chiqarishi mumkin. Shuningdek, Koroner sudi marhum uzoq vaqt davomida alkogol va Xanax preparatiga qaramlik bilan kurashganini ma’lum qilgan.

Bundan tashqari, shahzodaning organizmida o‘limga olib kelishi mumkin bo‘lgan miqdorda gamma-gidroksibutirat, ya’ni keng tarqalgan “klub narkotigi”, shuningdek kannabis, alprazolam hamda boshqa bezovtalikni kamaytiruvchi dori vositalari izlari aniqlangan.

Sud materiallariga ko‘ra, shahzoda vafotidan bir kun avval mehmonxona kuzatuv kameralarida uning tashqariga sigaret chekish uchun chiqayotgani ko‘ringan. Oradan ko‘p o‘tmay, xonani tozalash uchun kirgan xodim beshinchi qavatdagi qulflangan xonaning yuvinish xonasida uni kiyimlari bilan yerda yotgan holatda topgan.

Voqea joyiga mehmonxona xavfsizlik xizmati va tez yordam xizmati chaqirilgan. Shifokorlar uning hayotini saqlab qolishga harakat qilgan, biroq foydasi bo‘lmagan va shahzoda voqea joyida vafot etgani e’lon qilingan.

Aniqlanishicha, u vafotidan uch oy avval London janubi-g‘arbidagi Rouhempton hududida joylashgan dunyoga mashhur Priory Clinic reabilitatsiya markazida davolangan. Shahzoda u yerda alkogol, benzodiazepinlar va pregabalin preparatiga qaramlikdan xalos bo‘lish uchun detoksikatsiya muolajalarini olgan.

Klinika psixiatri Viktoriya Chamorroning sudga taqdim etilgan bayonotida shahzoda davolanish jarayonida shifokorlar tavsiyalariga yaxshi amal qilgani, boshqa bemorlar bilan samimiy munosabat o‘rnatgani va davolanishni muvaffaqiyatli yakunlagani qayd etilgan. Shifokorlar uning klinikaga qabul qilinganida tushkunlik va xavotir alomatlari kuzatilganini bildirgan. Biroq davolanish yakunida unda o‘z joniga qasd qilish xavfi yo‘q, degan xulosaga kelingan.

Priory klinikasidan chiqqach, shahzoda Mersisayd grafligidagi Rainford Hall xususiy klinikasida davolanishni davom ettirgan. Ushbu muassasada unga yuqori nafas yo‘llari infeksiyasi tashxisi ham qo‘yilgan. U sog‘aygach, 2025 yil 14 oktyabr kuni klinikani tark etgan.

Sud-tibbiy ekspertizasi shahzodada hech qanday o‘tkir yoki surunkali kasallik bo‘lmaganini ko‘rsatgan. Xulosaga ko‘ra, uning o‘limiga narkotik moddalar va alkogolning birgalikdagi ta’siri oqibatida yuzaga kelgan yurak to‘xtashi sabab bo‘lgan.

Tergovchi yordamchisi Jan Xarkin marhumning o‘z joniga qasd qilganiga oid hech qanday dalil topilmaganini bildirgan. Uning qayd etishicha, Priory va Rainford Hall klinikalarining hisobotlarida ham shahzodaning suitsid xavfi yo‘qligi ko‘rsatilgan, u hech kimga bunday niyati borligini aytmagan va mehmonxona xonasidan ham xayrlashuv xati topilmagan.

Shuningdek, tergov davomida uchinchi shaxslarning voqeaga aloqadorligini tasdiqlovchi dalillar aniqlanmagan. Kuzatuv kameralari yozuvlarida ham shahzodaning o‘limidan oldingi oqshom yolg‘iz bo‘lgani qayd etilgan.

Eslatib o‘tamiz, avvalroq amerikalik moliyachi va jinsiy jinoyatlarda ayblangan Jeffri Epshteyn uchun yosh ayollarni topib berganlikda gumon qilingan modellar agenti Daniyel Siad Fransiyadagi uyida o‘lik holda topilgan edi.