Самарқандда 9,5 млрд сўмлик газ “туя қилинди”
3-саҳифа
−
23 Октябрь 2023 6120
Самарқанд шаҳридаги 9 та кўп қаватли уйда қарийб 9 млрд 535 млн сўмлик табиий газдан, 2 та кўп қаватли уйда эса 64 млн 800 минг сўмлик электр энергиясидан ноқонуний фойдаланилгани аниқланди. Бу ҳақда Энергетика вазирлиги ахборот хизмати хабар берди.
Қайд этилишича, вазирлик ҳузуридаги “Ўзэнергоинспекция” томонидан тегишли органлар билан ҳамкорликда ўтказилган назорат тадбирларида Самарқанд шаҳридаги 136-144-сонли кўп қаватли уйлар (9 та) табиий газ тармоғига “Биллинг” дастуридан рўйхатдан ўтмаган ҳолда уланиб олиб, ундан ноқонуний фойдаланиб келаётгани маълум бўлган.
“Ушбу кўп қаватли уйлар “А.Б.” МЧЖ томонидан қурилган бўлиб, дастлабки ҳисоб-китобларга кўра, тизимга қарийб 9 млрд 535 млн сўм (25 млн 90 минг 836 метр куб) зарар етказилган”, дейилади хабарда
Шунингдек, мазкур ҳудуддаги 142-143-сонли кўп қаватли уйлар электр энергиясидан фойдаланиш учун шартнома тузмасдан, “ПК-учёт” базасида рўйхатдан ўтмаган ҳолда ноқонуний фойдаланиб, тизимга 64 млн 800 минг сўм зарар етказгани аниқланган.
Қоидабузар истеъмолчига нисбатан белгиланган тартибда чоралар кўриш учун тегишли ҳужжатлар ҳуқуқни муҳофаза этувчи органларга тақдим қилинган.
Live
Барчаси
