Саида Мирзиёева ва Меҳрибон Алиева Бакуда ўзбек маданиятига оид кўргазмани очиб берди

Кеча, 17 март куни Озарбайжон пойтахти Баку шаҳридаги Ҳайдар Алиев марказида "Чоклардаги мерос: Ўзбекистоннинг каштачилик ва тикувчилик анъаналари бўйлаб саёҳат" кўргазмаси очилди. Кўргазманинг очилишида Озарбайжон Республикаси Президенти Илҳом Алиевнинг рафиқаси ва мамлакатнинг Биринчи вице-президенти Меҳрибон Алиева ҳамда Ўзбекистон Республикаси Президенти Шавкат Мирзиёевнинг тўнғич қизи – Президент ёрдамчиси Саида Мирзиёева иштирок этди. Бу ҳақда “Azərtac” хабар берди.

Очилиш маросимида Озарбайжон Республикаси Президентининг ёрдамчиси, Ҳайдар Алиев маркази директори Анар Алакбаров сўзга чиқиб, Озарбайжон билан Ўзбекистон ўртасидаги кўп асрлик дўстлик ва қардошлик муносабатлари, айниқса, кейинги йилларда Президент Илҳом Алиев ва Президент Шавкат Мирзиёевнинг ўзаро яқин шахсий муносабатлари туфайли муваффақиятли ривожланиб бораётганини алоҳида таъкидлади. Президент ёрдамчиси Озарбайжон-Ўзбекистон муносабатларида маданий алоқалар алоҳида ўрин тутаётганини таъкидлаб, ўзаро маданият кунлари муваффақиятли ташкил этилганини эслатди.

Анар Алакбаров ушбу кўргазма мамлакатлар ўртасидаги дўстлик ва қардошлик муносабатларининг яна бир кўрсаткичи эканини таъкидлаб, шундай деди: 

“Ҳайдар Алиев маркази бугунги кунда халқаро анжуманлар, кўргазмалар ўтказиладиган майдонга айланди. Тадбирни ўтказишда кўрсатган ёрдами учун Озарбайжон Биринчи вице-президенти, Ҳайдар Алиев жамғармаси президенти Меҳрибон Алиевага ўз миннатдорлигимизни билдирамиз. Ўзбекистон Республикаси Президентининг ёрдамчиси Саида Мирзиёева ҳамда Ўзбекистон маданияти ва санъатини ривожлантириш жамғармасига раҳмат. Бугун биз Ҳайдар Алиев маркази деворларида Ўзбекистонга бағишланган илк тадбирни ўтказмоқдамиз. Кеча UNESCOнинг маданий мерос рўйхатига киритилган рақс “Лазги. Руҳ ва севги рақси" примераси бўлиб ўтди. Хабарингиз бор, кейинги ҳафта Наврўз байрами нишонланади. Ушбу байрам кунлари ташриф буюрувчилар бугун очилган кўргазма, шунингдек, бир кун аввал тақдим этилган Даниэль Вуртселнинг “Ҳаво фаввораси” инсталяцияси билан танишишлари мумкин”.

Тадбирда Ўзбекистон Президентининг ёрдамчиси Саида Мирзиёева сўзга чиқиб, Озарбайжонда бўлгани ва ушбу кўргазма мамлакатда ташкил этилганидан мамнунлигини билдирди. 

“Бугун Бакудаги Ҳайдар Алиев марказида "Чоклардаги мерос: Ўзбекистоннинг каштачилик ва тикувчилик анъаналари бўйлаб саёҳат" номли катта кўргазма очилмоқда. Ушбу кўргазма нафақат декоратив-амалий санъат коллекциясини намойиш этади, балки Ўзбекистон маданий меросининг бой ранг-баранглиги, унинг тарихий теранлиги ва маданий эволюцияси тимсоли эканлигининг жонли гувоҳидир”.

Саида Мирзиёева Ўзбекистон ва Озарбайжон ўртасида ўзига хос тарихий алоқалар мавжудлигини таъкидлади.

“Иккала давлат кўп асрлик тарих ва бой маданий анъаналарга эга. Ўзбекистон ва Озарбайжоннинг тарихи, маданияти ва анъаналарида кўплаб умумий жиҳатлар мавжуд. Ҳар икки халқнинг меҳмондўстлиги, бой миллий таомлари, каштачилик, ёғоч ўймакорлиги, кулолчилик каби нодир халқ амалий санъатининг бой мероси бор. Ушбу улуғ воқеа халқларимиз ўртасидаги яна бир кўприк, гўзаллик ва аҳиллик йўлидаги саъй-ҳаракатларимиз бирлашганлигимиз исботига айлансин”, деган Мирзиёева.

Маърузалардан сўнг Озарбайжон Биринчи вице-президенти Меҳрибон Алиева ва Ўзбекистон Президентининг ёрдамчиси Саида Мирзиёева Ҳайдар Алиев кўмагида тайёрланган “Озарбайжон гилами-илмоқ рақси” ва “Санъатдаги қўғирчоқлар” кўргазмалари билан танишди.

Таъкидлаш жоизки, гиламлар коллекцияси саккиз йил ичида яратилган. "Яраниш", "Шикаргаҳ", "Хон Ову", "Уруш ва тинчлик", "Банди-Румий", "Шабекали", "Одам ва Момо Ҳаво", "Агаcли", "Нарли", "Кўл", "Лечак- турунc”, “Тўрт фасл”, “Тагли”, “Жемадат” гиламлари, “Жаннат қушлари” ва “Жаннат боғи” дастурхонлари – бетакрор санъат намуналари катта қизиқиш билан кутиб олинган. Тўпламдаги гиламларнинг ҳар бири нақш ва безаклар орқали ташриф буюрувчиларга ўзига хос хабарни етказади.

“Қўғирчоқ санъати” кўргазмасида 200 дан ортиқ қўғирчоқлар намойиш этилган. Кўргазмада намойиш этилаётган санъат намуналарининг аксарияти бир нусхада тайёрланган бўлиб, юксак бадиий қийматга эга. Ушбу асарларнинг аксарияти халқаро қўғирчоқ фестиваллари ва биенналеларида ғолиб бўлган.

Сўнгра Меҳрибон Алиева ва Саида Мирзиёева "Чоклардаги мерос: Ўзбекистоннинг каштачилик ва тикувчилик анъаналари бўйлаб саёҳат" кўргазмасининг рамзий очилишини билдирувчи лентани кесиб, экспозиция билан танишди.

Маълум қилинишича, Ўзбекистон маданияти ва санъатини ривожлантириш жамғармаси билан ҳамкорликда ўтказилаётган кўргазмада ушбу мамлакат музей коллекциясидан 140 дан ортиқ декоратив-амалий санъат намуналари намойиш этилмоқда. Ўзбекистоннинг маданий-тарихий мероси ва миллий либосларига бағишланган кўргазма XIX-XX асрларда Ўзбекистон ҳунармандчилигининг қайта тикланишини акс эттиради. Ўзбекистонда санъатнинг бошқа турлари орасида Бухоронинг зардўзликлари азалдан алоҳида ўрин тутган.