Сабрина Жабборова Туркияда операция қилинадиган бўлди

Ўзбекистонда хизмат кўрсатган артист Озода Нурсаидованинг “Дилбарим” қўшиғига клип суратга олиш жараёнида автомобиль уриб кетган 22 ёшли актриса Сабрина Жабборова Туркияда операция қилинадиган бўлди. Бу ҳақда актриса ўзининг Instagram саҳифасида маълум қилди.

Ижтимоий тармоққа жойлаштирилган видеода хонандалар Озода Нурсаидова ва Муниса Ризаева Сабрина билан учрашгани акс этган. 

“Уч кундан бери бутун Ўзбекистон халқи мен учун қайғуриб, даволанишим учун картамга пул ташлаяпти. Бунинг учун халқимга катта раҳмат демоқчиман. Эртага онам билан Туркияга учиб кетяпмиз. У ерда туркиялик профессор мени операция қилади. Бориб кўрикдан ўтганимиздан сўнг улар қанча пул кетишини менга айтишади. Ҳамма харажатлар сизлар ташлаган пуллар эвазига қилиняпти”, дейди Сабрина Жабборова.

Озода Нурсаидова эса кўп нарсадан бехабар бўлгани учун Сабринадан узр сўраган. 

“Шу кунгача кўп нарсадан менинг хабарим йўқ эди. Операциядан кейин оёғи 7 сантиметрга калта бўлиб қолганини мен интернетга видео чиққанидан кейин билдим. Мен тўғриси реабилитация бўляпти, деб хурсанд бўлганман. Биламан, бу мени оқлайдиган вазият эмас. Мана ҳозир келиб, Сабринани кўрдим, вазиятдан тўлиқ хабардор бўлмаганим учун Сабринадан узр сўрайман. Уни эндиликда 2-3 босқичли операция қилиш керак экан. Халқимизга Сабринанинг соғлиғига бефарқ бўлмагани учун катта раҳмат дейман. Ўйлайманки, мушкул операциядан Сабрина эсон-омон ўтволади”, дейди Озода Нурсаидова. 

Ўз навбатида, Муниса Ризаева актриса учун Туркиядан шифокор излаш жараёни қандай бўлгани ҳақида гапирган. 

“Туркияда кўп врачлар олмаймиз деди, лекин бир профессор олиб келинглар деди. Шундан сўнг биз Сабринанинг карта рақамини ўз саҳифаларимизда тарқатдик. Жуда кўп инсонлар картага қўлларидан келганича пул ташлашяпти. Картада ҳозир яхшигина сумма йиғилди. Ўша пуллардан биз Туркияга авиачипта олдик, Истанбулдан уй ижарага олдик, шифокорларни гаплашдик. Агар яна Сабринага кимдир ҳомийлик қилиб, ёрдам бермоқчи бўлса, биз хурсанд бўлардик”, дейди Муниса Ризаева.

Эслатиб ўтамиз, жабрланувчи актрисанинг мурожаатида машинанинг ғилдираклари унинг устидан икки марта ўтиб кетгани, воқеа оқибатида  тос суяги синган, бошқа аъзолари оғир жароҳат олгани айтилади. Шунингдек, 9 соатлик операциядан сўнг беморнинг ҳаёти сақлаб қолингани, бироқ жарроҳлик амалиёти нотўғри бажарилгани оқибатида унинг чап оёғи ўнг оёғидан 7 см узунроқ бўлиб, қиз ногирон бўлиб қолгани билдирилган.

Қайд этилишича, айни вақтда шифокорлар қизнинг саломатлигини тиклаш учун унинг тос суягини синдириб, суякларни тўғрилаш кераклиги, бундай операциялар жуда камдан кам ҳолатларда муваффақиятли ўтишини айтган. Унинг сўзларига кўра, суратга олиш ташкилотчилари ва бошқа айбдор шахслар жабрланувчига етарлича ёрдам кўрсатмаган. Фақатгина 4 ой давомида “фильмни суратга олишда техник қоидаларни бузганлиги” учун жарима сифатида 500 доллар тўлаб турган.

Мазкур ҳодиса бўйича иш судга оширилган, лекин ҳали суд жараёни бошланмаган. Актриса терговчи унга иш материалларини тақдим қилмаганини айтган. Шунингдек, у нормал юриш қобилиятини тиклаш учун чет элда такрорий операция ўтказиши кераклигини айтган ва жамоатчиликдан ёрдам сўраган.

Орадан кўп ўтмай Озода Нурсаидованинг ўша клипида ишлаган ижодий жамоа мазкур вазиятга изоҳ бериб, актриса ва унинг яқинлари улардан уй ва машина талаб қилаётганини айтиб чиқди.

4 ой мобайнида мазкур йўл-транспорт ҳодисаси содир бўлгани ҳақида лом-мим демай келаётган Тошкент шаҳар ИИББ актрисанинг мурожаати ижтимоий тармоқларда кўплаб муҳокамаларга сабаб бўлганидан кейин ЙТҲ ҳақида ахборот бериб, 2024 йилнинг 7 ноябрь куни соат тахминан 13:00 ларда Мирзо Улуғбек тумани Янги Ўзбекистон кўчасида жойлашган автотураргоҳларнинг бирида ҳайдовчи вояга етмаган 2008 йилда туғилган С.П. Mercedes Benz русумли автомашинада ҳаракатланиб, 2 нафар пиёдани (2003 йилда туғилган Ж.С. ва 2006 йилда туғилган Ш.Э.) уриб юборганини маълум қилди.